Malaysia Um Chinpa In Covid-19 Khamsii A Dawtnak Ih A Hmuhtonmi

Tulai cu Covid-19 khamsii dawtawk rero laitak a si, Covid-19 khamsii dawt hrih lo pawlin thilumdan theih an cak zet ruangah Malaysia um Chinpa in a hmuhtonmi pawl in hlawm a si.

“A bikin Malaysia um pawl hrang. Tuisun (23-6-2021) cu COVID -19 khamnak si, KL, Convention Centre, Malaysia ah kan nupa in kan va dawt ve. Anmah rammi pawl Malay le Chinese (Tuluk) pawl thawn kan si. Ramdang mi cu an um lem lo.

Kan kiangih umah ramdang mi an tel lo. Pakhat pahnih cu an um men thei. Natnak khamnak si dawt ding kan si tikah mi an tuamhlawm ṭha zet. A bawm rori in mi an bawm sawn. Kan fehnak ding kan thei lo pang ding tiah zin pialnak ding vek khalah an rak um ih mi an sim.

Ngaingai cun keimah cu 26, June ih Natkhamnak si dawt ding ka sinan Sibawi (doctor) pawlin tuisun ah dawt lawlaw aw in tiih anmah in ka form khal in ngansak thluh. Sidawt man hi a lak (Free) a si. Tidai thiangte le Dessert Chocolate le retnak dip (bag) sen te tla in pe.

Ramdang mi le anmah rammi in thleidang lo. Si in dawtmi khal a bang aw hai. Cumi ka duh lo cu mi ka duh ti a ngah lo. Dawt ding in timi dawt a si mei. A vawi hnihnak cu 14-7-2021 ah in dawtsal ding a hmun cu amah kel a si ko. Nan duh tiktik can ah nan ra thei zing 8:00am in zan 8:00pm sungah in ti.

Malay ṭawng thiam lo asile Mirang a ngah. A pahnih ih na thiam lole ṭawng lettu na rualpi maw na fale si maw na hruai thei. Tulai cu taxi le Grab san tikah mi pakhat lawng a ngah. Asinan si dawt ding Vaccine lole Vaccination ding kan si cun pahnih to an siang OK ti a si ko.

COVID khamnak si dawt duhtu Malaysia ih um mi pawl cu Mysejahtera timi Scan nakah form ngan in dil a theih. Upa hi mi an duhsak ih tuan deuh zamrang deuh ah mi an ko. Kannih tla kan fanu hrang kan dil nan kan ngah hrih lo. Cun dam lonak nei pawl khal thuphan per loin na sim a ṭha.

Ziangahtile nangmai hrang thotho a si. Kei tla thisen sang (Hypertension) ka nei ih ka nei timi ka sim ka hril. Form sungah ziangmi natnak na nei timi Malay le Mirang in an ngan thluh ih cumi hril men a si. A awl ngaingai a thiam hrangah cun.

A thiam lo pawl cun rualpi a thiam hnenah nan sim kei an lo ngansak ding. Cu lole FRO, CRC, ACR, ZAM tivekah bawmnak nan dil thei. Mi bawm ding an man ringring anmai Card tuahtu pawl hrangah. Keimah khalin ka lo bawm thei hai. I suttu an tam ruangah kim deuh ih ka ngan mi a si. Terima Kasi Malaysia. Ka lung a awi Malaysia. (# Alfred Paro Facebook)

Be the first to comment

Leave a Reply

Your email address will not be published.


*