Mandalay Ah Palik 2 An That Ruangah Mipi An Kai Ciamco, An Kaih Tummi An Rak Um lo Ruangah Toktarh Ah Midang An Kai

June 8 sun ah Mandalay, Patheingyi khuasung ah palik 2 cu zo ti theih loin an kap that, bike thawn lamzin ih an tlan lai cu motor in an pah thutthi. Cutin, motor sung ihsin mino rual an va suak ih an kap that hnuah an tlanhlo, palik 2 an that ruangah ralkap le palik pawlin an hmuhhmuh vengsung mino cu an kai vivo.

Vengsung mino 2 Zeyar Tun le Kaung Myat Kyaw khal June 11 sun ah kai dingin an inn ah an va feh ih an rak um lo ruangah innsung ih um minung 3 an kai. Innsung ih rak um hringtu an nu dam lo bese zet Daw Tin Shwe, an farnu Ma May Shin Thant le an upa Than Htike Soe cu toktarh hrangah an kai.

An sungkhat Ma Wai Wai in “Toktarh hrangah an kai, ka ṭapa 2 in zianghman an thei hrih lo, ra kai dingin an ra ti an theih veten an ṭih ruangah an rak tlanhlo. Ka nu ih a ke a ṭha lo ih a damlo tuk, inn sungih um zaten an kai thluh. Rinsan ding kan nei nawn lo, kan ṭapa 2 in ziangsualnak hman an tuah lo, lamzawhnak ahcun an tel.

Daiten lamzawhnak ah an tel men, innsung ih um minung 3 an ra kai ih khuitawk ah an hruai tum ti khal kan sut thei lo. Ziangruangah nan kai tin kan sut khallen in sawn lo” tin ṭap phahin media hnenah a sim.

An rualpi pakhat in “An sualdan cu a rapthlak tuk, an kaih tummi an rak um lo asilen an hmuhhmuh midang an kai vivo. Sualnak nei lo khal sualnak an hawlsak, aunty cu a damlo bese tuk. Daan le dun nei loin uico ralkap pawl an cangvai” a ti.

Daw Tin Shwe le Ma May Shin Thant cu Patheingyi Police Station ah an khum, Than Htike Soe le an kaihmi midang mino 3 cu No. 1 Police Station ah an khum ti theih a si.

Be the first to comment

Leave a Reply

Your email address will not be published.


*