Mandalay Bus Neitu Cu Bus An Mawng Lo Ruangah An Kai

December 10, 2021 hi leitlun huap Minung Covo Ni (Human Rights Day) a si. Himi sirhsan in Myanmar ramsung ah daiten duhphorh ni Silent Strike tin cangvaihnak an nei, Myanmar ram cu ralhrang in an control lo, mipi in an control ti langter cikhat khal a si.

Zinglam nazi 10:00 ihsin simlam nazi 4:00 tiang cu mai innsung ciar ah daiten um men ding, dawr ong lo ding. Vaksuak lo ding, innsung ah hnipuan dum hruh in daiten um men ding ti a si.

Khitaya Man Bus Station neitu, Mandalay-Yaynanchaung tlan bus pawl neitu U Aung Min Lwin in, “Ka bus pawl an ṭha lo ruangah tuisun cu kan tlansuak thei lo ding” tin a tarlang hnu nazi 1 hrawngah ralhrang pawlin an va kai hngal.

A rualpa in, “Ralhrang pawlin an ra kai, a phone le thil dangdang khal an laksak. Tutiang an suah hrih lo” a ti. Ralhrang pawlin a kut an tawnbet ih an hruaisuak lai cu venghnen pawlin an rak hmu.

Cumi hnuah a facebook cahmai ah, “Ka bus pawl an ṭhasal zo, passengers pawl kan lo hngak lai” tin ca tarlang mi hmuh a si. Himi cangantu hi zo a si ti media pawlin an zingzoi rero lai, U Aung Min Lwin cu ralhrang pawlin an kaih ruangah himi cangantu cu anmah ralhrang pawl khal an si thei, asilolen ralhrang pawlin an fial khal a si thei.

Be the first to comment

Leave a Reply

Your email address will not be published.


*