Mandalay Ramsung Ah Nauhak Kum 5 Mi An Pawngsual Ih A Thi

Rampi buai laiah hivek thuthang theih bet cu a poi tuk. Mandalay, Mogok ah nunau nauhak kum 5 mi an pawngsual ih a thih thu DVB thuthang ah an tarlang.

Min Tada veng sungih um nauhak kum 5 mi cu a hlo ruangah a nulepa in palik sakhan ah mihlo thubuai an va thehlut, hringtu a nu hi a hnaset. Cutin an hawl rero hnu August 27 zanlam nazi 2:00 hrawngah paa hawl pawlin thicia in thlanmual kiangah an hmu, ramlak ah taklawng in an sar ih a lu/hmai ah hliamhma nasa zet a tuar.

Mogok siizung ah zohdiknak an nei ih sibawi in an pawngsual hnuah a lu ih an vuaknak hliamhma ruangah a thi tin a nenhnget. Pawngsualtu khal an kai ngah zo ih an innkiang ih um mipa ritheihsii tham ṭheu a si.

Tualsung mi pakhat in “Nauhak hruaitu cu an innkiang ih um a si, nauhak cu paisa 700 a pe ih hmun dangah a hruai. Vengsung mipi pawlin riitheih sii a tham ṭheu an ti, vengsung ih ara umnak khal thlakhat hrawng lawng a si lai” a ti.

Nauhak a hruai lai cu mi ṭhenkhat in an rak hmu ih cutin an theisuak. “Nauhak cu lungto in a sut, a hmai khalah hliamhma nasa zet a tuar. Nauhak pawngsualtu cu minung pathum kan si a ti, vengsung mipi pawlin an vuak, an velh ciamco hnuah palik hnenah an hlan” a ti.

Palik pawlin zopawl an tel ti zingzoinak an nei rero lai, tualsung mipi pawlin an kaihmi pa cu riitheih sii tham ṭheu a si ih thawngtla suak a si an ti.

Be the first to comment

Leave a Reply

Your email address will not be published.


*