Manipur Ah Kawlram Mi 24 An Kai

India, Manipur ramsung ah hnaṭuan dingih feh Kawlram mi 24 cu ID card lem thawn an kai. An kaihmi pawl cu Sagaing ramkulh, Monywa ramsung ih um an si. Kawlram sungah hnaṭuan ding a harsa ruangah Manipur ramsung ah ṭhiamtahnak company Weaving Industry ih hnaṭuan dingih feh an si.

October 6, 2021 sun ah Moreh check-up ah an rak zohdik ih Aadhar Card lem thawn an kai thluh. Weaving Industry ih hnaṭuantu pakhat in “Minung 24 an kaih thu kan thei, nunau le nauhak khal an tam zet. Cun, ID card lem an keng ruangah an thubuai cu a sang zet ding.

Manisun khalah kan hnaṭuannak hmun ah palik pawl an ra ih zingzoinak an nei. Tuisun khalah palik pawl an rasal, kannih khal kan ṭih tuk ruangah kan relh. Ka zumdan cun ID card lem tuahtu an hawl a si ding” a ti.

Manipur ramsung ah Kawlram mi 500 hrawng cu thiamtahnak hmun ah hnaṭuan in an um. Tulai India ramsung ah Kawlram mi an kaih thuhla hi theih ding aum deuh ringring.

September 30 sun khalah Manipur khawpi Imphal airport ah Kawlram mi 14 an kai. Imphal ihsin Delhi ih feh tum an si. September 12, 2021 khalah Kawlram mi 26 cu Assam khawpi Guwahati ah an kai ih an thuhla cu buaipi rero lai a si. Tulai ramtinkim an buai thluh ruangah kan vahsuah tikah kan fimkhur a ṭul zet. (#Khonumthung Burmese)

Be the first to comment

Leave a Reply

Your email address will not be published.


*