Mara Army Le CDF Mara An Kapaw Ih CDF Pakhat Ih Nunnak Liam

March 25, 2022 ah Thantlang peng, Ngaphaite khua ah Maraland Defense Force & Mara Army (MDF) pawl an va lut ih CDF Mara thawn an kapaw. An kahawknak ah CDF ralkap Salai Pawpaw Mahein ih nunnak a liam.

Tualsung mi pakhat in, “Salai Pawpaw cu Min Aung Hlaing in ramsung thuneihnak a lak ruangah CDM tuah palik a si” a ti. CDF-Mara in ca an suah hngal: “March 25, 2022 simlam ah MATC/MDF pawl cu CDF-Mara umhmun khuarnak la dingin minung thazang le ralthuam thazang kimcang thawn an ra lut.

CDF-Mara leiram a simi Ngaphaite khua ih um CDF-Mara le khuanu khuapa pawl theihter hmaisa loin ralthuam thawn an ra lut ruangah an rak kham ih MDF pawlin hringhronak ah meithal an kap puak. Khuasung mino pawl cu tlawnginn ah an kokhawm ih meithal kahnak thawn an hringro ih CDF-Mara pakhat an kap that. Pahnih in hliamhma an tuar, curuangah CDF-Mara khalin kan kap ve ih himi ca kan suah tiang cu nasa zetin kan kapaw rero lai” tin an tarlang ih mithi le hliamtuar pawl hrang an riahsiatnak an langter.

Maraland Defense Force-MDF khalin ca an suah ve: “March 25, 2022 ah meeting ih rocalcatnak vekin nunau ralkap (2) le harhdamnak ih ṭuanvo neitu (4) cu Sawhmo tlawngtluan ah training kai mino pawl thawn tongawknak nei dingin an va feh.

An fehlam ah Sawhmo tlanglak Ngaphaite khua ah CDF-Mara upa pakhat in uniform le ralthuam kengin ra feh hlah uh a tiih MDF pakhat in ‘Mara ramsung ah Mara miphun pawl cu zalen zetin kan tlangleng thei’ tin a letsawng hnu ihsin an dinhmun a ṭha lo.

March 25, 2022 simlam ah Ngaphaite tlawnginn ah mipi tonkhawmnak kan nei, mipi tonkhawmnak kiltu MDF pawl ih meithal cu CDF-Mara in an lonsak ruangah kaphnih kahawknak a thleng” tin an tarlang. Mara miphun karlakah kahawknak a thleng cu poi an ti zet ih mithi innsang le hliamtuar hrang an riahsiatnak an langter.

Be the first to comment

Leave a Reply

Your email address will not be published.


*