Matupi Ah Chin Pastor 2 In Bomb Kammi An Pal Puak

Chin State, Matupi, Rezua khua ih tlawnginn tualrawn ah Chin pastor 2 in bomb kammi an pal puak. April 2 sun ah kum 37 mi Pastor Yoe Myo le kum 43 mi Pastor Tim Za Lian cu tlawnginn sungah an va lut ih vanduainak an tong.

Pastor Tim Za Lian ih ke pakhat a tan ruangah Mizoram ah an tuamhlawm rero lai. Tualsung mi in, “Khuadang ah an va feh phah ah tlawnginn ah an lut duak ih tlawnginn an zoh. Himi tlawnginn ah ralhrang pawl umhmun an rak khuar zo, ralhrang pawl cu an tlung thluh zo.

Ralhrang pawl ih kammi bomb a si, bomb paltu pakhat sawn ih ke a tan” a ti. Ralhrang pawlin ‘himi bomb kamtu cu CDF pawl an si, bomb puak ruangah pastor pahnih in hliam an tuar ih tlawnginn khal a siat’ tin an tarlang. Asinan, CDF- Rezua in anmai kammi bomb a si lo thu le ralhrang pawl ih kammi bomb a si thu an phuang.

Ralhrang pawlin an kammi bomb cu an thianfai sal lo ruangah himi kiangkap hrawngah feh lo dingin CDF in ralrinnak an suah. Ralhrang in thuneihnak an lak hnuah Chin ramsung ah bomb kammi ruangah minung 5 ih nunnak a liam zo.

Be the first to comment

Leave a Reply

Your email address will not be published.


*