May 28 Zan Tahan Khuasung Doawknak Ah Ralhrang 4 An Thi, An Doawknak San >>>

May 28 zan ah tualsung mipi ralkap tangtlang le ralhrang pawl cu Kalaymyo, Tahan vengsung ah an kapaw ciamco.

Zanlam nazi 5:30 ihsin Zomi PDF, CSS, CNDF, PDF-Kalay le GRF pawlin Tahan, nicia tat kiangih umhmun khuar ralhrang pawl cu an va kap ih ralhrang 4 an thi, hliamtuar 8 an um. Zan nazi 8:00 ah tualsung mipi ralkap pawl cu khawngaw ngah um loin an kirsal.

Ralhrang pawlin pukpi le meithal an kap ciamco ruangah tualsung mi 3 ih nunnak a liam. Kum 25 mi MC Vanlalawmpuii(Puipui) cu ralthuampi in a puah ngah ruangah a nunnak a liam, ralhrang pawl bomb le meithal kahnak ruangah Tahan vengsung ih um Daw Ni Ni Aye (kum 47) le a fapa kum 26 mi Ko Pho Myat Oo khal an thi.

Daw Ni Ni Aye tei nufa cu Sagaing peng, Mingin khua ihsin raltlan an si, Tahan ah mi innluat in an khuasa ih ralhrang pawl ih ralthuampi in a tlak ngah ruangah an nunnak a liam.

People’s Defense Force – Zomi in, “Ralhrang pawl kan va kahnak a san cu cozah dik loin mipi pawl hnenah dik lo zetin meisa man a khong ṭheu ruangah a si. Ralhrang pawl hnenah dik lo zetin meisa man khong nawn lo dingin mipi ralkap tangtlang in ralrinnak kan pe zo nan an thlun duh lo ruangah ralring peknak ah kan va kap” tin an tarlang.