Meithal, Ralthuam An Neih Nawn Lo Ruangah KSO In A Langten An Cawl Lawk Ding Thu An Phuang

Sagaing ramsung ih mipi ralkap pawlkom pakhat KhinU Support Organization in May 3, 2022 ah meithal, ralthuam an neih nawn lo ruangah dothlennak ah a langten an cawl lawk ding thu an phuang. Sagaing ramsung ah ralhrang pawl do ṭheutu pawlkom pakhat an si.

May 3 sun nazi 12:00 hrawngah Ywa Thit Kone ih umhmun khuar ralhrang pawl cu drone hmangin bomb pathum an thlak puak, cutawk ah ralhrang (2) an thi ih (4) in hliam an tuar. Simlam nazi 3:00 hrawngah Mu Tim Chaung lilawn parih um ralhrang motor pathum cu drone hmangin bomb an thlahsal, asinan vanduai thlak zetin ralhrang pawlin an drone cu an rak kap siat.

Khin U Support Organization (KSO) in, “Uico pawl dawinak dingah meithal, ralthuam kan nei nawn lo ruangah a langten kan cawl lawk ding ti thu kan phuang ih mipi pawl in ngaithiam hram uh. Tuini tiang kan cangvaih theinak cu mipi pawl ih bawmnak zarah a si.

Bawmnak aum lo ahcun zianghman kan cangvai thei lo. Meithal, ralthuam cu dothlennak kan thok ihsin kan ṭul ringring, ralthuam lawng siloin thil dang khal kan ṭul” tin DNG thuthang hnenah an sim thei. Ralhrang pawl ih an kahsiatmi an drone (cet te) cu ting 50 lenglo ih an lei pekte mi a si.

Ralhrang pawl donak ah sumpai tam zet an cemliam zo. Sagaing ramsung ah mipi ralkap pawlkom tam zet an um ih pawlkom tenau deuh pawl cu bawmtu nei loin an um ruangah tuahcop meithal, ralthuam an hmang ṭheu. An ralthuam test-nak ah cansualnak tong ih nunnak liamtu khal an um hnuaihni zo.

Be the first to comment

Leave a Reply

Your email address will not be published.


*