Mi Pahnih Vaw That Zo Tu In Namtong In Midang A Sat

April 18. 2022 sun nazi 2:00 hrawngah kum 40 hrawng mi Sangtea in Mizoram, Nghalchawm khua leithanel laknak hmun ah mi pahnih a tuahmawh. Fa 3 nei zo Pu Lalbiaknia (kum 29) le tlangval kum 27 mi Lalrinnunga cu namtong in a sat.

Hliamhma nasa zet an tuar ih siizung ah an tuamhlawm rero lai, Pu Lalbiaknia (Nitea) cu a besia deuh ruangah Aizawl Civil Hospital ah an tuamhlawm. Pu Lalbiaknia ih lu ah namtong ih sahnak hliamhma nazet aum, hmunriat ah an ṭhi ih a luruh a khem.

Tlangval Lalrinnunga ih awm ah nam ih sahnak hliamhma thuk zet aum, Sairang siizung ah a hliamhma hi an ṭhitsak hnuah innlam ah tuamhlawm aw dingin an tlung. Mi tuahmawhtu Sangtea in 2016 kum ah Sihhmui khuami Pu Lalkaia le tlangval Lalramlawma cu an lu ah nazet in a vuak, tlangval Lalramlawma cu a ni ah a thi ih Pu Lalkaia cu a thaisun ah a thi.

Himi lai caan ah Sangtea hi Sihhmui khua ah mikhual in aum ṭheu, tual a that ruangah thawnginn ah an khum. Thawnginn ihsin a suah hnuah Sihhmui khua ah aum nawn lo ih Nghalchawm khua lamah mikhual in aum. Nghalchawm khua ah kum 4-5 hrawng aum zo in an rel, tulai hi Tlawng tiva kiangkap hrawngah aum ṭheu. Kum 2 hrawng cu khua ah aum nawn lo.

Sangtea in a tuahmawhmi Pu Lalbiaknia ih farnu cu arak uar dah, Pu Lalbiaknia ih farnu in a ṭih thei tuk ruangah biak khal a be ṭha ngam dah lo. Kum le caan a liam vivo hnuah Pu Lalbiaknia ih farnu khal pasal anei zo. Tulai thal ti mal laiah a pasal thawn Tlawng tiva kap ah leithanel la in tiva kap ah an riak, thlakhat sung cu tiva kap ah leithanel la in hna an ṭuan ih an riak zo.

Tuisun April 18 sun ah tiva kap ah an umkhawm ih Pu Lalbiaknia ih rualpa Rinnunga in Sangtea cu a capoh, a liamzo mi thilthleng hmangin a capoh. Sangtea cu a thinheng tuk ih ṭongkam an el’aw, cumi hnuah hmun dangdang ah an fehliam. Ṭongkam elawknak khal an nei peh nawn lo.

Lalrinnunga le Pu Lalbiaknia cu tiva kap ah an ding. Hitin an um laiah Sangtea cu namtong thawn ava tlan ih Pu Lalbiaknia ih lu ah a sat thutthi, Lalrinnunga khal ava pan ih arak ralring man. Namtong in veili veinga hrawng a vai hnuah a awm ah a sat ngah.

An buainak hmun hi leithanel laknak hmun a si ih an kiangkap ah hnaṭuantu pawl an um, hliamtuar pahnih cu an tuamhlawm hngal. Sangtea khal an kaibet ih Nghalchawm khua lamah an panpi, VC inn ah khuatlang hruaitu pawlin an kil ih palik pawl thleng ding caan an hngak. Cumi hnuah mi tuahmawhtu Sangtea khal a thih thu theih a si, a thihdan thuhla cipciar cu theih a si hrih lo. (#Mizo Special Report)

Be the first to comment

Leave a Reply

Your email address will not be published.


*