Mihlo An Hawl Ih An Phone Rero Nan Phone Arak Kai Duh Lo, “Theih Lo Mi Number A Si Ruangah” A Ti

US, Colorado tlangsang zet ah mipa pakhat ava kaiso ih lamzin a hlo. Nazi 24 hnu khalah a thlennak hotel ah a tlung lo ruangah tualsung palik pawl an theihter, Lake County Search and Rescue (LCSR) in het leh chet tin an hawl rero.

An phone rero nan phone cu arak kai duh lo. Ca an kuat ih voicemail khal an kuat nan arak zoh duh cuang lo, a san cu phone number hi a theih dah mi a si lo ruangah a ti.

October 18 sun ah an hawl ih an hmu lo, a thaizing ah tlangpar ah an va hawlsal ih cutik lai caan ah a thlennak hotel ah tluangten arak thleng. Amah hawltu pawl khal an ko tlungsal. “Simlam ah lamzin ka hlo ih ka motor umnak ka hawl vivo. Phone number hi ka theih dah mi asilo ruangah ka rak kai duh lo, in hawl ding ti hi ka rak ruat lo lawlaw” a ti.

Ramtaw pawl hi lamzin an hlo asikhallen mihlo ah an ruat’aw dah lo, anmahten lamzin an sialsuak ṭheu. Thuneitu lam in “Na theih dahlo mi phone number asikhallen an lo phone rero a si ahcun thil poimawh aum si ding ruangah phone cu rak kai mai uh” tin theihternak an suah.

Thudang: Pacang Zuri A Hlo Ih An Hawl Ciamco, Mihlo Hawlnak Ah Arak Telve
Turkey, İnegöl khua ih um pacang kum 50 mi cu a hlo ih an hawl ciamco, mihlo hawlnak ah ava feh ih a hawl ve. Pacang Beyhan Mutlu le a rualpi pawl cu an khuahnar ah zu an intlang khawm ih hmun dangah a feh hnuah a kirsal nawn lo.

A rualpi pawlin an hawl rero nan an hmu thei lo ruangah police hnenah an report. Cutin police le khua sung mipi pawlin het leh chet tin a hlohnak kiangkap hrawngah an hawl ciamco nan a sulhnu hmuh ding aum lo ruangah an mangbang tuk.

Mihlo hawlnak ahcun ava feh ve ih zo an hawl ti khal thei loin a hawl bawm ve. A innsang le a rualpi pawlin an rak theithiam lo cu mak an ti zet, caan tawkfang an hawl hnuah an beidong tuk ih a hmin an ko ciamco.

Beyhan Mutlu in a hmin an ko a theih veten a mangbang ih mipi lak ihsin “Um lawk hrih uh, zoso kan hawl ih? Kei cu hinah ka um si” a ti cu an lungawi in an hnisuak tuk. Mi tlawmngai pawlin Beyhan Mutlu cu an inn ah tluangten an va thlahliam.

Be the first to comment

Leave a Reply

Your email address will not be published.


*