Mihlo An Hawl Rero Mi 3 Cu Thlanmual Ah Thicia In Hmuh An Si

Kayin State, Hpa-An peng, Thamma khua ih um mipa pathum cu an thuhla theih ding um loin an hlo, an hawl rero nan an hmu thei lo. Ni 13 hnu November 21 sun ah thlanmual ah thicia in hmuh an si. An hmin cu Aung Kyaw Thu (kum 40), Ko Kyi Cho (kum 26) le Ko Thaw Thaw Thwin (kum 30) pawl an si.

An pathum in Administrative Office zung ah cangantu an si. Mithi lakih tel Aung Kyaw Thu cu October 30 sun ah ralhrang pawl dinpinak puai ah ava feh tin kiangkap um mipi pawlin an rel.

November 8 zan nazi 8:00 hrawngah zo ti theih lo pawl cu Honda Fit motor in an zung sungah an va lut ih an pathum in an hruaisuak hnuah an thuhla hi theih a si nawn lo. An khua lal in, “An hloh hnuah kan hawl rero nan kan hmu thei nawn lo, an thuhla theih ding aum nawn lo.

Mani sun ah thlanmual kiangih lek nauhak pawlin mithi ruak pathum cu an hmu ih kiangkap ih lo hnaṭuan pawl hnenah an sim thei. Cutin an ruak pathum cu hmuh a si, an hloh ni ah an that hngal a si ding ti kan zum. An ruak hi a sia thluh zo, an hnipuan lawngin anmah an si ti kan theithei” a ti. Zo in an that ti an thei hrih lo ih himi tualthatnak ruangah kaihmi khal an nei hrih lo tin an khua lal in media hnenah a sim thei.

Be the first to comment

Leave a Reply

Your email address will not be published.


*