Min Aung Hlaing In, “2020 Kum Hrilawknak Ihsin Ramsung Buainak A Thok” A Ti

August 8, 2022 sun ah Nay Pyi Daw ah ralhrang le cozah hnaṭuan pawl an tonaw khawm ih meeting an nei.

Cutawk ah Min Aung Hlaing in, “Ramsung thuneihnak kan laknak a san cu 2020 kum hrilawknak ih buainak ruangah a si. 2020 kum hrilawknak ah diknak, zalennak um sehla cun tui dinhmun kan thleng zik lo. Vote diklo aum ruangah zohdik sal dingin kan dil nan an zohdik duh lo ruangah buainak a suak ih ramsung thuneihnak kan la a si.

Neta ah 2020 kum hrilawknak cu kan zohdik sal ih ramsung milesa sinak ID nei lo ih vote thlak mi khal an um. Kumkim hrih lo ih vote thlak khal a um, veihnih vote petu khal an um ih mithi zo hmangih vote petu khal an rak um” a ti.