Min Aung Hlaing In ASEAN Le Ramdang Pawl Ih Mithmai Ṭha Ngah Tum In Thawngtla Pawl A Suah Zalen, Asinan Ṭhenkhat A Kaisal

ASEAN ramdang palai pawlin “ASEAN Summit ah Min Aung Hlaing kan sawm nawn lo ding. ASEAN Summit meeting ih kan thurelcat mi pawl a thlun lo, ralkap pawlin rampi daihnak dingah hmai an hruai lo. Meeting ih kan relcat vekin an kaihmi pawl khal an suah zalen lo. Curuangah Min Aung Hlaing cu ASEAN meeting ah kan sawm nawn lo ding” tin thuthluknak an rak nei zo.

Ralkap pawl cu an thinum anuam lo zet, ralkap pawl ih ramdang dawrtu U Wunna Maung Lwin in “Ralkap pawl hotu Min Aung Hlaing tello dingih nan relcatmi cu kan dokalh a si. ASEAN member pakhat nan hlon cu ASEAN ih lungrualnak hrangah thil poi zet a thleng thei” tin ralrinnak a pe.

October 18 sun ah Min Aung Hlaing in thawngtla 1316 le tazacuai tong 4320 zat an suah zalen ding thu a phuang ih a zan ah mi tampi an suah cih. Mandalay, Meikhtila Prison thawnginn ihsin thawngtla 34 an suah zalen ih an lungawinak mitthli khal a hul hlanah 11 cu an va kaisal.

Meiktila ramsung ih NLD MP U Lwin Maung Maung, NLD Party sungṭuan U Thet Maung Maung, Daw Thin Kyu Aung, U Myint Thein, U Thaw Gyi le lamzawhnak ih hruaitu Daw Lay Lay Naing pawl telin minung 11 cu thubuai dang, misual cangvaihnak ah tel tin an va kaisal.

Daw Lay Lay Naing rak hmuaktu in “Pukmah 505 an orhmi ihsin an suah zalen ih pukmah 50, 52 hmangin an rak kaisal. Minung covo an siatsuah, kan thin natnak dang in pesal. Kan hliamhma ah nam in an ra at vek a si. Meikhtila thawngtla suak 34 lakah 11 cu an ra kaisal” a ti.

Be the first to comment

Leave a Reply

Your email address will not be published.


*