Min Aung Hlaing In, “Mipi Le Ralkap Pawl Thekdarhtu Cu KT Media A Si” A Tiih Report Pe Cio Dingin Forhfialnak A Nei

Min Aung Hlaing in ramsung thuneihnak a lak veten tualsung thuthang latu / phuangtu media pawl cu hremnak a pe vivo. Thuthang latu tam zet a kai zo ih an license pawl khal a hlonhlo sak thluh. Ramsung ah thuthang cazual suah a siang nawn lo ih, Myanmar ram cu leitlun ah thuthang cazual neilo ram umsun a si.

Media pawl cu lenglam ah an cangvai thei nawn lo ruangah online sungah an cangvai. Thlahlawh khal an nei lo nan mipi in ramsung, ramleng thuhla thei ve seh ti an duhsak ruangah online sungah thuthang phunphun an ngan rero. Myanmar ramsung thuthang lakah cun Khit Thit Media hi a tum pawl a si ih mipi khal a funkhawm tam zet.

January 1, 2018 kum ah an rak din ih thuthang phunphun an tarlang ṭheu. Min Aung Hlaing in vei tampi warning a pe zo ih May 8, 2021 ah thuthang an suah theinak license cu a phitsak.

Meiktila ah 74th Army (Air) Ceremony an nei ih cutawk ah Min Aung Hlaing in, “Mipi le ralkap pawl thekdarhtu cu media pawl an si” a ti hnuah Khit Thit Media cu report pe cio dingin forhfialnak anei. Report pekdan ding khal cabu te in an suah ih an zemaw thluh.

December 17, 2021 sun nazi 1:00 ah vei leh khat ah tin report pe cio dingin thu an than’aw. Cumi hnu khalah report pe ringring dingin an sim theiaw ih Khit Thit Media cu ti siat rori an tum. Ralhrang pawlin Khit Thit Media cu thuthang diklo phuangtu a si, ralhrang pawl thuhla diklo zetzet ih tarlang ṭheutu a si an ti.

Khit Thit Media in, ralhrang pawl ih cangvaihnak phunphun cu arak tarlang ringring. Khua an urkaannak, mi an pawngsualnak, khuasung mi 11 an urthatnak, motor thawn lamzawhtu pawl an pahthatnak cu online sungah a tarlang ih ralhrang in himi cu thudik lo a si an rak ti ve.

Be the first to comment

Leave a Reply

Your email address will not be published.


*