Min Aung Hlaing In Sagaing Le Chin Ramsung Ih Ralkap Pawl Hotu Dingah Ralbawi Sual, Rapthlak Zet A Thlah

Sagaing le Chin ramsung ih ralkap pawl hotu dingah ralbawi 2 an thlah thu theih a si. Northwestern Regional Command (NMSP) ih umhmun khuar, Special Task Force No. 1 ih ralbawi Lt. Gen. Tay Za Kyaw cu September ah an rak thlah zo, cumi hnuah ralbawi misual hminthang an timi Lieutenant General Than Hlaing an thlahsal.

Sagaing le Chin ramsung ah mipi thazang a cak deuhdeuh ih ralkap pawl an tlasia tuk ruangah an hotu pawl an thleng danglam. June le August thla sung lawngah Sagaing ramsung ah ralkap 840 lenglo an thi, Chin ramsung ah 136 an thi tin National Unity Government (NUG) in thu a suah.

Sagaing ramsung ah ralkap pawl an thi tamtuk, doawknak tualrawn ah mipi kilhimtu pawl an neh thei lo, CDM tuah ralkap an tam vivo. Sagaing ramsung ih ralkap pawl kaihruai awknak a ṭha lo tin Sagaing ramsung ih ralkap pawl hohatu General Phyo Thant cu a hnaṭuannak ihsin an cawlhter ih a inn ah an kharhkhum.

Ralkap sung thuhla theitu pakhat in, “Lieutenant General Than Hlaing cu a lungruh tuk, February 16 ah a sinak a kaisang bet. A naupa Ko Soe Gyi khal ralkap uknak dodal in a cangvaih ruangah May thla ahkhan an kai ih ni 2 hnuah a thih thu theih a si. Min Aung Hlaing hnenah a hnaṭuannak ih a rinumzia cu a cangvaihnak ihsin pholang a tum ringring. Minung khal a si lo” a ti.

Be the first to comment

Leave a Reply

Your email address will not be published.


*