Min Aung Hlaing In “Suu Kyi Cu A Dam Ṭha Tuk, Inn Ah Aum” A Ti

Hong Kong hrambun China Media picang Phoenix Television in May 20, 2021 ah Myanmar ralkap hotu bik Min Aung Hlaing cu hmaiton thusutnak an nei. Ralkap in thuneihnak an lak hnu ihsin aveikhat interview-nak a si.

Ramdang thuthang pawlin interview an tuah tum ṭheu nan an tong thei dah lo. China le Russia pawl lawngin interview an tuah thei lai, an biakawknak pawl cu kimcang zetin an tlangthan ding lai.

An biakawknak ṭhenkhat cu Nobel Peace Prize ngahtu kum 75 mi Daw Aung San Suu Kyi ih thuhla an sut ih Min Aung Hlaing in “Suu Kyi cu a dam ṭha tuk, a inn ah aum ih a harhdamnak khal a ṭha. A rei hlanah court hmaiah a lang cing ding” a ti.

May 24 sunah Daw Aung San Suu Kyi cu Naypyidaw court ah a lang dingih a thubuai pawl an rel ding. Cun, Assistance Association for Political Prisoners (AAPP) in Myanmar ramsung ah minung 815 zat an thi zo an timi khal thuphang a si a ti.

Min Aung Hlaing in “Mithi 300 hrawng an si ih palik 47 an thi ve” a ti.

Min Aung Hlaing cu July 3 ah kum 65 a kim ding, July 3, 1956 kum ih piang a si. Ralkap daanhrampi 2008 vek asilen kum 65 hnu cun ralkap a ṭuan thei nawn lo dingih a pension thlang ding. Asinan, a sangtu ciah General Soe Win hi a kaisang ko dingih Min Aung Hlaing vek thotho ih misual le mi turu a si.

Be the first to comment

Leave a Reply

Your email address will not be published.


*