Mindat-CDF In Ralkap Tlan Pawl An Kilkhawi Hnuah Lai Meithal Thawn Mindat Mipi An Kilhim Ve

Mindat mipi kilhimtu PDF pakhat in a thilton cu hitin a tarlang; “Kan hnenah ralkap ihsin tlansuak ṭhenkhat an khuasa, thlakhat zikte hrawng an um zo. Kan soisa lo ih hridai thawn khal kan tawnbet lo.

Zalen zetin kan umter ih kan rawlei vek kan eiter. Kiltu cu kan ret ringring, kuak le zufa (ခေါင်ရည်) khal kan theitawkin kan pe. Chi Chaung ih CDF pawl Kanpalet lam ih umhmun an va khuar laiah ralkap in hmun 3 in in ra kulh, dungsip ṭul dinhmun ah kan um ih khuasung mipi putar, pitar, nauhak tete khal khua suahsan in ramlak ah an tlan.

Kan hnenih um ralkap pawl khal kan kilkhawi a cang thei nawn lo ruangah kan theitawkten thawng 50 ciar kan pe, an lamzin man ah tin kan pe ih an mithmai cu a nuam lo zet ti a theihtheih. Cutin kannih cu dunglam ah kan sip, khua pakhat kiangah umhmun kan va khuar ih kan hnenih um lawk ralkap pawl cu kan hmusal.

Ṭhenkhat in mipi bungrua pawl an phursak, ṭhenkhat in Lai meithal an keng ih khuasung mipi raltlan pawl an rung hruai cu kan mangbang tuk. “Nan tlung hrih lo maw?” tin ka sut ih “Hitin rawl in petu khuasung mipi pawl tanta in kan feh thei lo, hmunhimnak an thleng hnuah kan tlung ding” in ti.

Ka nauhak lai ih Vietnam raldo zuknung ka zohmi ka vun mangsuak, a cangtu cu Arnold a si. American ralkap a si ih Vietnam raldo dingin a poksuak, asinan Vietnam mipi pawlin an rak kilkhawi ih an hnenah aum. Cumi hnuah aumnak Vietnam mipi pawl cu arak kilhim sal.

Ka thiltonmi ruangah himi zuknung ka vun mangsuak. Tu’ahcum kan hnenah kan umter ih Lai meithal khal pakhat ciar an keng, a hlanah cun kan rak zum lo. Ṭha zetin mi kan kilkhawi asilen kan hnenah an ra kirsal ti cu ka zum zo, an kut ah an meithal ngai a thleng ding caan a rei nawn lo” tin a tarlang.

Be the first to comment

Leave a Reply

Your email address will not be published.


*