Mindat Le Kanpetlet Mino Pawl Cu Ramlak Ihsin Thailand Le Malaysia Ram Ah An Feh Tam, Harsatnak Phunphun An Tong

Chin ramsung a buai vekin Mindat le Kanpetlet mino tam zet cu hnuailam, ramlak ihsin Thailand le Malaysia ram ah an feh cece. Mino kum 18 kiangkap hrawng an si ih nunau an tam sawn, mipa cu malte lawng an si.

Kanpetlet khuami pakhat in, “Mindat le Kanpetlet mino pawl cu tlawng an kai thei lo, hnaṭuan ding aum lo. A hlanah cun tlanglo ah hna an ṭuan ṭheu, Coffee hmuan ah tla hna an ṭuan. Asinan, tu’ahcun hnaṭuan ding zianghman aum nawn lo.

Ziangvek asikhallen ramdang feh lawng an hrangah aum zo. Nulepa pawl khalin an fale hi khua ah an um asilen ralhrang in an kai ding, an that ding ti an phang. Nulepa pawlin an fale hrangah ramdang feh cu luatnak ciikhat ah an ruat thluh” a ti.

Hnuailam ihsin Malaysia fehtu pawl cu mi pakhat ah ting 30 an cem. Pakokku ihsin Thailand ramsung ah an lut ih puaisa pawlin an fehnak ding lamzin cu an tawlrel sak. Ṭhenkhat kaih tong pawl cu an puaisa pawlin an buaipi, asinan ṭhenkhat cu kaih an tong hnuah an puaisa in an tlansan ṭheu.

Pakokku ṭuanvo neitu in, “Motor pakhat ah nunau 30 le mipa 1/2 an to ṭheu. Ṭhenkhat cu a bakin an feh ih an thlen hnuah thla 3 hlawh an cutsak, tluangten an fehsuak thei asilen zarhkhat sungah Malaysia ram an thleng thei” a ti.

Ramlak an fehnak ah harsatnak phunphun tong an um, ṭhenkhat cu ramlakah an puaisa pawlin an tlansan ih ei le in ding an nei lo. Kan dungah Kawlram ihsin Thailand ramsung ih lut nunau pahnih cu motor sungah thawsam in an thi ih ramlak ah an hlon. Ramlak an fehnak zalam tluan ah pawngsual tong le hmuhsuamnak phunphun tong khal an um.

Be the first to comment

Leave a Reply

Your email address will not be published.


*