Mino 6 Ih Ruak An Urkang, An Ruhro Lak Khal An Siang Lo. Ma Wai Wai Myint Pasal Ih Anka

August 10 sun ah ralkap pawlin Yangon, Botahtaung Township, 44 lamzin kap ih um inndot number 38-nak ah mino pawl umhmun an khuar ti an thei ih an va check-up. Inndot par lamah an va kaiso ih Kaung Min Thant cu an kap tla, a rualpi 5 khal kutkai aw in an dawp ve cih ih an thi thluh.

Ralkap in “An umnak khan sungah thilri kan hmu ruangah thubuai nei an si” an tiih an ruak lak khal an siang lo. Inndot par ihsin dawp ve lo an rualpi 2 cu an kai ih thu an sut rero lai. August 11 zanah ralkap pawlin mithi ruak cu an urkang ih an ruhro lak khal an siang lo.

Himi thuhla ah Ma Wai Wai Myint ih pasal haa sibawi Dr. Soe Myat Thu cu media pawlin phone in thusutnak an nei. An thusutmi į¹­henkhat cu Ma Wai Wai Myint ih ruak nan zoh thei maw? Ma Wai Wai Myint cu thla 3 naupai lai a si maw? tipawl an sut.

Dr. Soe Myat Thu in “Ma Wai Wai Myint ih ruak cu kan zoh thei, nau a pai lo. Mithi ruak 4 an urkang lai cu ka hmu, ka nupi ruak hmaiah mithi ruak pakhat an nor ih a ke ihsin thihnai a fawr rero. Dunglam ah ruak 2 an run nor bet..” a ti.

Mithi dang pawl ih innsang member teh an ra maw? tin an sutsal ih Dr. Soe Myat Thu in “Midang innsang pawl cu an ra lo, ziangruangah ti cu ka thei lo. Kanmah innsang pawl lawng kan um, Ma Wai Wai Myint in a fanu kum 5 le thla 8 mi a fehsan.

Ralkap pawl ih cangvaihdan cu minung covo an siatsuah a si, an ruhro lak khal an siang lo. A ruak kan ngah lo asikhallen a ruhro tal in lakter uh, anmah theihhngilh lonak dingah tin kan dil nan an siang lo. Covid-19 boruak sia ruangah mithi ruak urkangnak cet lamah buainak aum an ti.

A cem tiang kan hngak dingih a ruhro cu kan la ding tin kan dil rero nan an siang cuang lo. Phum ding khal zianghman kan nei lo, a thlan sungih ret ding mi pangpar pakhat cu ka tlun. Ziangkhal lole theihhngilh lonak dingah thil pakhat khat cu kan tuah ding, a hnipuan a kor pawl kan phum mai ding” a ti.

Be the first to comment

Leave a Reply

Your email address will not be published.


*