Minung 11 An Urthatmi Lakah Nauhak Kum 6 Mi A Tel, An Urthat Mi Pacang Ih Nupi In, “An Parah Thleng Ve Lo Dingin Thlaza Ka Camsak” A Ti

Sagaing, Salingyi Township, Dontaw khuami 11 cu December 7, 2021 ah ralhrang pawlin an kai ih hridai thawn an tawnbet hnuah an khuapawn ah an hruai ih an urthat thluh. Tualsung mi pakhat in, “Khuami 11 pawl cu an nung lai rori in an urthat, an ṭap an raak ciamco ṭapthawm cu kan thei nan kan va run thei lo” a ti.

An urthatmi lakah nauhak kum 6 mi khal a tel, an urthat hlanah nasa zetin an vel ciamco ta. An urthatmi pawl cu Ko Aka Soe (kum 14), Ko San Min Oo (kum 17), Ko Than Myint Aung (kum 17), Ko San Ko (kum 17), Ko Kyaw Thet (kum 17), Ko Chit Nan Oo (kum 19), Ko Win Kaw (kum 20), Ko Htet Ko (kum 22), Ko Zin Min Tun (kum 22), Ko Tint Naing (kum 30) le nauhak kum 6 mi pawl an si.

An urthatmi pawl hi meithal kengin ralhrang pawl dotu an si lo ih khuasung mi men an si, ralhrang pawl ṭih ah an relh ih ralhrang pawlin an kai. An urthat mi pacang ih nupi cu media pawlin phone in thusutnak an nei. Media: “Na pasal in ziangvek thil a tong? Ziangtin nan lut thei?”

#“Ka pasal cu a luat lo, kei cu ka pasal in luat dingin in tlanter. Ka fapa thawn bike in kan tlan, rawl le hmuk kan fun ih kan tlansuak. Ka pasal cu kan khua lamah a kirsal ih cumi hnu reilote ah ralhrang pawl kan khua ah an thleng ih bomb le meithal awn kan thei ciamco hngal” a ti.

A pasal in a nupi le a fapa hi a seherh tuk ruangah an khua ihsin a tlansuah lohli, anih cu amah lawng a si tikah a humhimaw thei ding thu a sim thei. Tlangpar an va kai hnuah a pasal cu a hei phone ih khuami ṭhenkhat thawn an relh thu arak sim thei, cumi hnu ihsin a be thei nawn lo.

A pasal ih ruak hmu ta loin an phum, an khua ah an kir ngam hrih lo ih hmun dangah an relh lai. “Ka pasal ruak ka hmu thei lo cu ka riahsia tuk, a netnak ah veikhat tal cu ka hmu duh tuk nan ka hmu thei si lo. Tulai buainak hi a cem hrih si lo, cem zangzang sehla ka duh tuk” a ti.

A fapa khalin a pa a thi ti a theithiam ih a riahsia zet, media pawlin, “Himi boruak sia thawn pehpar in ziangmi thu na sim duh?” tin an sut ih “Rapthlak zetin ka pasal an that, ka riahsia in ka lung a kuai. Khami ni kha ka theihhngilh nawn lo ding, annih khal hivek dinhmun sia an parah thleng lo hram seh tin thlaza ka camsak. An fale pawl khal hngakṭah dinhmun thleng ve lo hram seh, nulepa nei lo dinhmun ah um ve lo hram seh tin thaza ka camsak” a ti.

Be the first to comment

Leave a Reply

Your email address will not be published.


*