Minung 11 An Urthatnak Kiangkap Ah Nauhak 11 Mi Telin Ruak 4 An Hmu

Sagaing, Salingyi Township, Dontaw khuami 11 cu December 7, 2021 ah ralhrang pawlin an kai ih hridai thawn an tawnbet hnuah an khuapawn ah an hruai ih an urthat thluh. Tualsung mi pakhat in, “Khuami 11 pawl cu an nung lai rori in an urthat, an ṭap an raak ciamco au-aw cu kan thei nan kan va run thei lo” a ti.

December 8 zinglam ah mi 11 an urthatnak kiangkap ah nunau nauhak kum 11 mi telin ruak 4 an hmu bet. Nauhak kum 11 mi le kum 50 mi Daw Win Yee ih ruak cu hmuan sungah thicia in an hmu, cun kum 80 mi Daw Than Sein le harhdam ṭha lo, feh thei nawn lo mi U Nyan Po ih ruak pahnih cu an innsung ah an hmu.

Tualsung mi pakhat in, “Nam in an sat that an ti, an urthatmi pawl ih sungkhat hlir an si. An fapa le an tule pawl an si, ruak kan sarmi U Nyan Po ih fapa khal an urthatmi ah a telve. An sungkua, sungkhat laicin zaten ralhrang pawlin an that thluh” tin media hnenah a sim thei.

December 7 zinglam nazi 8:00 hrawngah ralhrang motor truck 3 in Dontaw khuasung ah an va lut ih khuasung inn le lo an siatsuah ciamco. Khuasung mi 11 cu an nunglai rori in an urthat, December 8 zinglam ah nauhak kum 11 mi telin ruak 4 an hmusal ih ralhrang pawlin Dontaw khuami 15 an that. Mithi ruak 15 pawl cu vuiliam dingin an tawlrel rero lai, Dontaw khua ah innsang 500 hrawng an um ih ralhrang in an khua hi veithum rori an nuaisiat zo.

Be the first to comment

Leave a Reply

Your email address will not be published.


*