Minung 800,000 Thattu Ralbawi

Kum 80 mi Théoneste Bagosora cu 1994 kum ah Africa, Rwanda ram ih ralkap pawl hotu a si. An ramsung ih um Tutsi timi tlangpar miphun pawl cu ti cimit tum in arak that ciamco.

Meithal, nam le tursia in a that ih minung 800,000 hrawng a that, Théoneste Bagosora cu himi tualthatnak ih hnarkaitu bik ti a si. Amah sirhsan in zuknung khal an tuah rero zo, April 6, 1994 kum ah an ram president cu meeting nei dingin vanzam thawn a poksuak.

An vanzam cu bomb/pukpi in veihnih an kap ih a puakdarh thluh, vanzam sungih um zaten an thi thluh. Cumi hnu ihsin Tutsi miphun pawl cu that thluh tum in an cangvai, an ramsung cu a buai zet ih PLEPF pawlin an ram thuneihnak cu an lonsak thei.

Cumi hnu ihsin Théoneste Bagosora cu ramdang ah a tlan, a tualthatnak cu leitlun huap rorelnak ah taza an cuai ih kai dingin an hawl rero hnu kum 2-nak ah an kai ngah ih Mali thawnginn sungah an khum. Damsung thawngtla ding ti a si nan 2011 ah kum 35 tiang thawngtla dingin an ṭhumsal, kum 89 a kim ah thawnginn ihsin a suak ding ti a si. Asinan thinlam damlonak a nei ih Mali siizung ah reipi an tuamhlawm rero hnu September 25, 2021 ah leitlun a suahsan (a thi).

Be the first to comment

Leave a Reply

Your email address will not be published.


*