Minung Sa A Zuar Ṭheu

German ram ih um mipa kum 58 mi in minung a that ih an sa a zuar ṭheu. Carl Großmann hi December 13, 1863 kum ah Neuruppin khua ah a piang, a nauhak lai ihsin nauhak danglam zet a si. A tleirawl laiah nunau nauhak kum 10 mi le kum 4 mi a pawngsual ih a hrem ciamco, nunau nauhak kum 4 mi cu a hliamhma tuar loin a thi.

Cutin palik pawlin Carl Großmann cu an kai ih kum 15 sung thawnginn sungah an khum, Thawnginn ihsin a suah hnuah leitlun ralpi a veihkhatnak a thleng ih khuasung mipi pawlin harsatnak phunphun an tong. Inn le lo neilo mi tampi an um ih lamzin kap ah an riak ṭheu.

Carl Großmann in lamzin kap ih um pawl cu arak that ṭheu, ṭhenkhat nunau cu aumnak inn ah a ko ih a pawngsual hnuah a phunphun in a hrem ciamco ih a that. An innkiang ah sadawr a ong ih sa a zuar, hot dog khal a tuah, khuasung mipi pawl an harsa zet lai caan khalah sa zuar ding arak nei ringring cu mipi in mak an ti zet.

A thatmi pawl ih an ruhcang le taksa ṭhem cu an khua kiang tiva ah ava hlon ṭheu ih palik pawlin mithi ruhro an sar ringring ruangah an khuasung ah thildik lo aum ding ti an zum. Mihlo khal an um ringring nan rambuai lai a si vekin zohman in an zingzoi ciamco man lo.

Kiangkap um pawlin zanṭim laiah mi ṭap thawm, mi-au thawmvang an theih ṭheu thu palik hnenah an sim ṭheu. August 21, 1921 zan ah a umnak inn sung ihsin mi-au thawmvang an theih ruangah tualsung palik pawlin an va lutchilh ih a ihkhun parah nunau that pekte mi ruak an hmu.

A innsung cu thihhnai in a khat ih tualthatnak hmunpi ti an thei, Carl Großmann cu palik pawlin an kai ih a sulhnu pawl an zingzoi tikah minung 100 hrawng a that zo ding ti an zum. Amah cun minung 20 a that thu a phuangaw, a sualtuah mi rapthlak zet ruangah thihdaan an orhter ih an that hlan July 5, 1922 ah amah le mah arak thataw, thawnginn sungah awkaw that ih a tualthatmi pawl khal a cipciar in an zingzoi thei nawn lo.

Be the first to comment

Leave a Reply

Your email address will not be published.


*