Minung Sa-ei In A Sirawknak A Rel, “A Nung Lai In Ka Rak Ei Lo Cu Ka Siraw Tuk” A Ti

Japan putar kum 73 mi Issei Sagawa cu kum 32 mi a si laiah minung sa arak ei, minung a that ih a sa a ei nan mak zetin thawng a tla lo ih a hminthang sawn. Amah sirhsan in zuknung khal an sersuak, a nulepa cu Japan milian zet an si.

Kum 32 mi a si laiah France ram ah tlawngkai in aum, a tlawngkaipi mirang fala kum 25 mi Renee cu a uar tuk. June 11 1981 ah an inn ah zanriah eitlang dingin a sawm ih zanriah an ei hlanah meithal in a kap that hnuah mithi ruak cu a itpi hmaisa, cumi hnuah a sa cu a ei.

A haa hi a ṭha tuk lo ruangah minung sa cu a ṭam ṭhiṭha thei lo ih dawr ah nam ava lei, nam in minung sa cu a candip ih a ei. A ke le a sungril, a lu cu suitcase sungah a thun ih hmun dangah ava hlon. Kiangkap ih um pawlin an rak hmu ih palik hnenah an sim thei, palik pawlin an zingzoi hnuah Issei Sagawa cu an kai.

Issei Sagawa in a that ih a sa a ei thu pawl a phuangaw, “Fala an uar tikah an kiangih um an duh, an rim an hnim duh ih an hnam duh. Kei cu an sa hi ka ei duh, ka that duh lo nan an sa cu ka ei duh. A nung lai in ka rak ei lo cu ka siraw tuk” a ti.

France palik pawlin ‘A thluak a kim lo, thubuai tuahsak a thlak lo’ an tiih thluak kimlo pawl umnak runinn ah an ret. A nulepa khalin an fapa cu an buaipi, France cozah in Japan ram ah a kuat ih France ram in thubuai an tuahsak lo ruangah Japan cozah khalin thubuai tuahsak theinak cahnah zianghman a nei lo ih tu’ah zalen zetin mipi lakah a tlangleng rero lai.

A thih hlanah minung sa a ei tum lai thu a rel. Issei Sagawa in, “Thalcaan June thla a thleng ih nunau pawlin taksa lang zikin hnipuan an hruh thlang. An taksa var note ka hmuh hi cun ka ei cak tuk. Tuisun ah train station ah ka va feh ih fala note taksa var nawn ka hmu cu ka thih hlanah minung sa ei ta ka duh. Tuizing ih ka hmuhmi vek kawng ngo tak cu ka ei cak tuk, ka thih hlanah ka ei ngah asilen hnangam zetin ka thi ding” a ti.

Be the first to comment

Leave a Reply

Your email address will not be published.


*