Mipi Humhimtu Pawl Cu An Khuasung Ah Lut An Siang Lo, PDF In A Riahsiatnak Thu A Tarlang

Kayah State-Shan State ramri kiangkap hrawngah tualsung mipi humhimtu KNDF B 06 le PDF pawl tangtlang in ralhrang pawl thawn an kapaw ciamco. Tulai an doawknak hi ni 20 lenglo a si zo ih ralhrang 100 lenglo an thi, mipi humhimtu 30 lenglo an thi ve.

February 15 ihsin an kapaw thok ih tuini tiang an kapaw rero lai, ralhrang pawl cu motor, tank le ke thawn khuakhat hnu khuakhat ah an lut vivo ih tualsung mipi humhimtu pawl an hawl. KNDF B 06 hotu in, “Meithal, ralthuam kan thlauawk deuh ruangah khuakhat hnu khuakhat ah kan tlan ih an dunglam ihsin kan va kapsal ṭheu. Kan leiram sung a si ruangah hmunram umdan hi kan theifiang ih an cangvai thei lo. Curuangah ralhrang pawlin an lutnak khua cu an siatsuah, an urkang vivo” a ti.

Khua ṭhenkhat ahcun mipi pawlin an khua ih lut an rak siang lo, ‘Nan ra lut asilen uico ralhrang pawlin kan khua hi an urkang ve ding” an rak ti. KNDF B06 hotu in, “Ralhrang pawlin an khua le ram an urkang sak, asinan ralhrang pawl ih sualnak cu an hmu lo ih kanmah sawn in mawhpuh. Kan hmailam caan hrangah nunnak thap in ral kan do rero lai” a ti.

Ralhrang pawlin tualsung mipi humhimtu pawl an kap ngah lo asilen an thinhengnak cu khuasung mipi pawl parah an cangvai, pukpi le helicopter in khuasung mipi pawl an kap ciamco ṭheu. Mipi humhimtu in, “Uico ralhrang pawl ih cangvaihnak cu an hmu lo, nanmah ruangah hmun dangdang ah kan tlan phah. Nanmah ruangah kan khua hi an urkang ding in rak ti cu ka riahsia tuk.

Thuhla a phunphun ruangah dung kan sip lawk ṭheu ih khuasung kan lut cu, ‘Kan khua ih nan rat asilen kan khua khal an urkang ding’ in rak ti. An ruahnak hi kan theithiam, curuangah khua thawn hlatawknak hmun ramlak ah kan va um, ralhrang pawl ih sualzia cu an thei ko nan mipi in hitin in rak pehtlaih cu ka beidong” tin media hnenah a sim thei.

Be the first to comment

Leave a Reply

Your email address will not be published.


*