Mipi Kilhim Dingin A Fehsuak Ruangah A Nu In A Fapa Sinak Ihsin A Hlon, “Ka Nu, A Lo Tlansantu Na Fapa Hi In Ngaithiam Aw Hlah. Ka Lo Duhdawt” A Ti.

Min Aung Hlaing in thuneihnak a lak ruangah Myanmar ramsung innsang tam zet ah mitthli tlaknak le ṭhenawknak a thleng rero zo. Bago, Pyay khawpi ih um tlangval Shine Htet Zaw cu mipi kilhim dingin ramlak ah a tlan ih PDF ah a lut.

Curuangah hringtu a nu in “Ka fapa Shine Htet Zaw cu nui thusim lung loin a tlansuak ruangah tuisun ihsin ka fapa sinak ihsin ka hlon a si. Hmailam caan ah a parah ziangvek thil a thleng asikhallen kei in ṭuanvo ka la lo ding” tin mipi hmuh dingin a tarlang. Cumi cu ramlak ih um a fahniang in arak hmu ve ih a thinum a nuam lo zet.

Shine Htet Zaw in “Ka nu, ziangkim ka sung thluh ding ti cu ka theicia. A lo tlansantu na fapa hi in ngaithiam aw hlah, mipi zaten hrangah lamzin dik sawn ka hril ruangah ka siraw lo, a cemnet tiang ka feh vivo ding. Ka nu, raldodan zaten zir dingin in siang hram aw, dothlennak ih tel pawl humhim dingin in siang hram aw.

Thuneihnak latu ralkap pawl hi an hrampi ihsin nuai cimit dingin in siang hram aw. Na fapa hi mipi inn le lo kilhim sak dingin in siang hram aw. Rampi zalennak, Federal Union ngahnak dingah raldo in siang ve aw. Misual ralkap pawl donak ah ka ulenau pawl thawn mipi hlumi rawl kan ei, mai hrang lawngih a hlu khong kan silo ti ka lo theihter duh.

Thla 5 sung rori ka lo pehtlaih lo ih ka lo tlansan ruangah in theithiam hram aw maw ka nu. Nulepa zoh loin mipi lawng ka rak zoh ruangah sualnak zianghman na nei lo, ziangkim hi na fapa ih sualnak a si. Nulepa tlansan aiih sual cu aum lo ding. Dothlennak ah nehnak kan co ih ka rak damlai asilen inn tlunnak ding ka nei nawn lo tilo ahcun kan sinpi thluh sokhaw ka nu. Ka lo duhdawt tuk ka nu” tin a facebook cahmai ah a tarlang.

Be the first to comment

Leave a Reply

Your email address will not be published.


*