Mipi Kilhimtu KIA In Khuasung Bike 15 An Laksak Mi Cu Tutiang An Pe Hrih Lo

Shan State, Kutkai Township, Panlaw khua ah Kachin Independence Army (KIA) le mipi karlak ah hmuhthiam awklonak a thleng. KIA in khuasung bike 15 an laksak ih ting 15 le cawcang pakhat in ra tlen uh an ti nan tutiang an tlen hrih lo ruangah bike 15 khal KIA in an pe kirsal hrih lo.

Khuasung mipi pawlin sumpai an harsat ruangah sumpai pek ding an neih lo thu media hnenah an sim thei. Khuami pakhat in, “Sumpai khal kan neidaih hrih lo, ṭhenkhat cun va pe dingin an rel rero. Ṭhenkhat in an neidaih hrih lo ruangah in hngak hrih uh an tiih sumpai cu kan va pe hrih lo. Sumpai cu kan khawl rero nan kan neidaih thei hrih lo” a ti.

Khuasung mi pawlin an bike cu ei le in hawlnak ih an hmangmi a si ruangah harsatnak an tong thu an rel. Tualsung mi in, “Ṭhenkhat cu bike thawn eihawl an si, bike thawn bazar an kai ṭheu. Bike thawn hmuan ah an feh ṭheu, bike an neih nawn lo ruangah vah suksonak ah harsatnak an tong. Bike ngahsal hi kan duh zet” a ti.

Himi thuhla ah KIA thuphuangtu U Ba Ye Gaung in, “An khawsen in sumpai ting 15 kan kuanter ih an nei lo ti cu a cang thei lo, thilcang thei lo a si. Himi thuhla ah direct in in ra pehtlaih lo, pawlkom dang hnenah bawmnak an va dil” a ti.

Himi thubuai a suahdan cu kan dungah Panlaw khua mipi pawlin KIA hmunram sungah thingkung le rua pawl an va hau ciamco ruangah KIA in ting 50 an kuanter, asinan khuasung mipi pawlin ting 15 le cawcang pakhat an kuan ding thu an rak sim thei nan tutiang an kuan lo. November 24 sun ah ramri lan in Panlaw khua mipi pawl cu KIA ramsung ah thingkung an va hau ciamco ruangah KIA in tualsung mi 6 cu an vuak ih an bike 15 khal an laksak tin Shan News thuthang sungah an tarlang.

Be the first to comment

Leave a Reply

Your email address will not be published.


*