Mipi Thilri An Rukmi Pawl An Zukpi Ih Miharsa Pawl Bawmnak Pe Vekin An Tarlang

Myanmar ralkap pawlin July 4 zanah thuthang danglam zet an tuah, Kayah ramsung ah raldonak ruangih harsatuar pawl hnenah bawmnak an pe thu an phuang.

Ralkap in “Kayah state, Demoso ramsung ah lamzawhtu mipi le tapung pawl an doaw ih inn le lo tampi an siatsuah. Cui inn le lo siatsuah mi pawl cu ralkap in bawmnak kan va pe a si” tin an tarlang.

An bawmmi pawl cu Demoso ramsung ih sakhua lam building 1, Department lam building 40, inn 16 pawl an si. Pheebon le Moebye Townships ih Department lam building 1 le inn 23 pawl an remṭhah sak thu an tarlang.

Demoso tualsung mipi pawlin an zukpi mi thilri, bungrua pawl cu Pyi Aung Yadanar Home Building Material Shop an rok ih an rak rukmi pawl a si.

An thilri bungrua pawl an langter ṭum ah khuasung mipi zohman an va feh lo, curuangah ralkap in an hmeltheih pawl cu khuasung mipi vekin hnipuan an hruhter ih thilri hlanaw vekin an zukpi. An zukpi hnuah an thilri, bungrua pawl cu ralkap motor sungah an retsal ih an sakhan lamah an tlan tin media hnenah an sim.

Demoso ramsung doawknak ruangah khuasung minung tingkhat lenglo cu ramlakah an tlan, a tam sawn cu khuasung ah an kir ngam hrih lo. Khuasung mipi pawlin an tuar tuk ruangah mipi kilhimtu KNDF in June 15 ah kahcawlhnak an neih ding thu an phuang.

Be the first to comment

Leave a Reply

Your email address will not be published.


*