Misual Hminthang Veng Lal Cu Shan Khosuai A Ei Laitak Ah An Kap That

Mandalay, Pyigyidagun Township, 65th le 133th Z veng lal U Soe Nyein cu December 12, 2021 zinglam nazi 7:30 hrawngah Shan khosuai a ei rero laitak ah meithal in an kap that.

Tualsung mi pakhat in, “U Soe Nyein hi ahlan ahcun meitat vek, mibawmtu vekin aum ṭheu. An farah zet, asinan ralhrang dung a thlun hnu ihsin lal vekin a tlangleng. Beer dawr tivek ah sumpai a khong ṭheu, lamzawhtu mino pawl khal amah rori in a vuak ih a kai. Innsang cazin a dil ih hringhro in sumpai a khong ṭheu. A fehnak tinkim ah dung thluntu anei, a vok lal len” a ti.

U Soe Nyein hi ralhrang pawlin meithal kah an zirter rero laimi a si, ralhrang pawlin Madanlay ramsung ah an kuthnuai ih veng lal ṭuan, khua lal ṭuan pawl cu meithal kah training an kaiter ṭheu ih an thiam hnuah meithal an pe tum. Vengsung mi pakhat in, “U Soe Nyein cu meithal kah a zir rero lai ti kan thei. A fehnak tinkim ah dungthluntu a hruai ringring, a thuhla cu a sia thluh. A thuanthu ah thilṭha zianghman aum lo” a ti.

Zinglam nazi 7:30 hrawngah U Soe Nyein cu an kap that ih nazi 9:00 tiang cu a thihnak kiangkap ah ralhrang pawlin zingzoinak an nei, U Soe Nyein kap thattu cu an kai ngah lo.

Be the first to comment

Leave a Reply

Your email address will not be published.


*