Mithi Zo Nupa, Thla !!!

1990 kum ah ka pate ih thilton a si, thilthleng ngaingai a si. Ka pate tei innsang cu khuadang ah an va tlawng ih an tlunlam ah Bestari Jaya lamzin in an tlung, zamtim laiah ka pate in motor a mawng ih a nupi le a fanau pawl cu motor sungah an itthat thluh.

An tlannak lamzin ah motor dang tlan an um tuk lo, a caan len motor tumpi truck lawng an tlan phahphah. Ka pate khal a ithmu deuh ruangah reilote sung lamzin kap ah a cawl lawk, minute 30 hnuah an hmaiah minung vek thil a hmu.

Cutin ka pate in motor cu a ti nungsal ih an poksuak, an hmai ih a thilhmuh cu nunau le mipa an rak si ih China neihawknak thuam an hruh veve. Neiaw pekte an si ding, asinan ramlak lamzin, minung umlonak hmun ah tihnung um zetin an rak feh rero ruangah ka pate in a tih tuk.

Ka pate in a kiangih to a nupi cu a thangharh ih a thilhmuh cu a zohter, a nupi in a hmuh veten a tih tuk ruangah a thia ciamco hngal. Ka pate in dunglam ih to nauhak pawl a zoh lawk ih an rak itthat lai, cutin cakpin motor cu a mawng ih an thilhmuh cu an feh lan.

Motor thlalang ihsin dunglam cu veikhat avun zohsal ih mipa le nunau cu ziangkhal ngaihsak mi nei lo vekin kutkai aw in an feh nekno lai avun hmu. Khua pakhat an thleng hnu lawngah an thilhmuhnak hmun cu China thlanmual ti an thei ih ka pate cu himi lamzin ah a feh ngam nawn lo.

Be the first to comment

Leave a Reply

Your email address will not be published.


*