Mizoram, Lungbyn khua, Lungbou raltlan camp ih um nauhak te pahnih cu June 16, 2022 ah tili ah an tla ih an nunnak a liam. Chin State, Matupi peng, Rezua khua ihsin raltlan an si.
Mual liamtu pahnih cu nunau kum 13 mi Noe Shwe Hla May le mipa nauhak kum 6 mi aw San Lay Oo an si. Mipa nauhak cu Paaw Kamlia le Nung Myn Khu Nung tei fapa a si. An ruak hi an hmu zo.
Myanmar ramsung buainak ruangah tualsung mipi pawl cu sahimnak hawl in hmun dangdang ah an tlan ih cutawk ah harsatnak phunphun an tong. An tlannak hmun ah thihlohnak an tong, ramlak ih um pawl khal damlonak phunphun in a tlak ih ei le in ah harsa mangbang in an um.
Thudang: Delhi (Noida) Ah Chin Tlangval A Thi, A Hnaṭuannak Company In Ṭuanvo An La Lo
New Delhi, Noida ih hnaṭuan Chin tlangval kum 19 mi Salai Pau Ngaih Thang cu June 15, 2022 ah sungdok natnak in a nunnak cem. Delhi thleng pek te a si, Kawlram buai hnuih Delhi thleng a si. An hnaṭuannak hmun cu China company OPPO innsaknak hmun ah a si, a hmun ah umchilh in hna an ṭuan. Ei le in cu company in a tumsak lo ih anmahten an tawlrel.
Salai Pau Ngaih Thang cu hnaṭuannak hmun ah a damlo, sungdok in a damlo ih a luak hnuah siizung an fehpi ih a thi. A thihnak thuhla ah a hnaṭuannak company in zianghman ṭuanvo lak an duh lo ruangah hnaṭuantu pawl cu hnaṭuan loin duhphorhnak an tuah.
Leave a Reply