Mizoram, Saiha ramsung ah Myanmar mi (2) cu meithal le cerek thawn an kaih thu June 1, 2022 ah theih a si. Ṭuanvo neitu pawlin thuhla an theih veten Zawngling khua ah zingzoinak an va tuah ih meithal pahnih le 70 mm bullets 20 thawn a neitu Myanmar mi pahnih cu an kai cih.
An kaihmi pahnih cu daan le dun vek ih hremnak pe dingin an thilri bungrua thawn Tuipang palik sakhan ah an ap. May 1 ihsin Mara Thyutlia Py (MTP), Mara Student’s Organisatiom , General Headquarters – Siaha pawl tangtlang in ramri ah thilṭha lo phur an um le um lo an check ding thu an tarlang.
India-Myanmar ramri a si mi Siasi, Shapi, Zyhno, Kaki, Khaikhy, Lobl, Naotla le Iana gate pawl ah nazi 24 sung zohdiknak an nei thlang ding. Ṭuanvo neitu in, “Ralhrang in Myanmar ramsung thuneihnak a lak hnuah mipi pawl parah diklo zetin a cangvai, mipi pawlin lamzawhnak in, CDM tuahnak in le hriamkainak in an do ve.
Mara ramsung ah miphun, sakhua thleidang loin Myanmar raltlan pawl cu kan cohlang. Asinan, ramri ah zu, ritheihsii le thildang daanpahbal mi phurluttu an um ṭheu ruangah kan thin a nuam lo zet. Himi ruangah buainak kan tong zo ih tualsung mipi pawl hnaihnoknak a suak.
Curuangah daanpahbal mi phur pawl cu kan lo kai asilen daan le dun vekin hremnak pek nan si ding. Meithal le cerek kaih tong hi vei 3-nak a si zo. India cozah in a duh lo mi thilri bungrua phurluttu cu kannih khalin kan cohlang lo a si” tin an tarlang.
Leave a Reply