Mizoram Ih Thingat Kawlram Mi Tiva Ah A Fen That

Kum 40 mi hrawng Pu Peka cu Kawlram mi a si ih Mizoram, Bairabi South ah thingat in caan reipi arak um zo. June 25, 2021 (Zirtawpni) zanlam nazi 4:00 hrawngah a rualpa thawn Tlawngral ihsin tiva an tan, tithuknak ihsin an leuh ih Pu Peka cu vanduaithlak zetin a leuhsuak thei lo ih a pilhlo.

Runsuak man loin a cangsual ih a fen that, ti tla an um ti an theih veten Joint YMA Bairabi kaihruainak in ruang an hawl hngal. Khawen laiah an hmu loin a zan khalah an hawl vivo.

Cutin June 26 (zarhte ni) sun nazi 12:20 ah tileuh thiam Pu F. Lalnunsanga in Pu Peka ih ruak cu a hawl hmu (Bairabi South, Mission Veng ih um Pu F. Lalnunsanga in tiva fen ruak tam zet arak sar zo, tuiṭum ih ruang an hawlnak khalah ara thleng pekte ih a hawl hmu hngal).

Pu Peka ih innsang pawl biak tlang dan ding an thei lo, a hminpum le a kumziat khal an thei lo (A dam lai zuk khal an nei lo). A ruang cu Bairabi PHC-ah post-mortem an tuah hnuah Bairabi South thlanmual ah Joint YMA Bairabi Vice President Pu H. Lalbiakmawia in a vuiliam.

Bairabi ah tiva fen an um tikah Joint YMA in ṭuanvo a la hngal ih, an kaihruainak hnuaiah Branch pahnih; North le South Branch in ruang hawl hna an ṭuan.

Pu Peka hi Bairabi North Branch YMA in kuang an tum ih, a thlan cu South Branch YMA in an laihsak. Pu Peka ruang cu zanlam nazi 3;30PM ah Bairabi South thlanmual ah an vuiliam. Tiva fen ruak hawlnak ah Sub-Hqrs YMA Kolasib le Zampuimanga Group YMA hruaitu pawlin an va bawm ṭheu. (Issued by: Bairabi Joint YMA)

Be the first to comment

Leave a Reply

Your email address will not be published.


*