Mizoram, Lunglei Ah Rapthlak Zet Ih Mithattu Rinhlelmi An Kai, Tahan Mi

September 6 zan nazi 7:00 hrawng ah Mizoram, Lunglei, Chanmari-III BCM Biakinn kot ah tualthatnak rapthlak a thleng. Biakinn kot ih um Lawngtlai, Siaha Sumo Counter (Duati Counter) neitu, K. Vanlalduati (52) cu zo ti theih loin an lutchilh ih nam in an dawt that.

Duati hi mifel le miṭha zet a si ih mipi khalin an ngaina zet, maxicab driver le amah dawrtu pawl khalin biak nuam an ti thei zet mi a si. Lunglei Chanmari veng ih um a si, a counter cu rawng hnih ṭhasal in dawr ah aum khuatlai deuh.

Cutin amah lawng ih aum laitak ah misual in an va lutchilh ih nam in an dawt, room sung umdan pawl zoh tikah misual in sumpai laksak a tum ruangah si an zum. Paisa khal a tla darh nasa tin mithmutu pawlin an rel. Lunglei police pawlin an zingzoi vivo ih Mizoram ih um Tahan F group mi Lalchawimawia (kum 24) cu tuisun September 8 ah an kai.

Tualthatnak ih nam an sarmi cu Lalchawimawia ih pai ṭheumi tin thu an dawng hnuah an va kai, court lam ih an fehpi hnuah Lunglei District Jail ah an khum. Special Investigation Team pawlin thilṭulmi pawl cu an zingzoi vivo lai ding.

Zonet Lunglei ih a tarlang dan ahcun “September ni 6, 2021 zanah Pi Vanlalduati rapthlak zet ih thattu kum 24 mi Lalchawimawia, Tahan F Group mi, Mizoram Thangte khua ah mi inn ih um cu Lunglei police pawlin a thlennak inn ah an va kai.

Special Investigation team pawlin “Pi Duati thattu hi a phuangaw hrih lo nan tetti ṭha tawk an neih thu press mi hnenah an sim thei. Lalchawimawia in a namte cu scooty seat hnuaiah a ret ih a hlo thu police hnenah a sim.

Police pawlin thubuai zingzoinak ah khuasung mipi pawl ih bawmnak zarah a si tin lungawithu an sim. Lunglei Police press conference hi tuizan September 8 zan nazi 7:30 ah Zonet JB1 channel le Zonet Lunglei Youtube Channel ah zoh a theih ding. (Zonet Lunglei Youtube hmetaw)

Be the first to comment

Leave a Reply

Your email address will not be published.


*