Mogok Ah Rukru In Inn An Bauh Ih Thil An Ru, An Thilruk Mi Cu An Inn Hmaiah An Va Ret Sal

Mandalay peng, Mogok, Peinpyit khua ah rukru in inn pakhat an bauh. May 19 zan nazi 8:00 hrawngah rua inn an bauh ih thil an ru. May 24 zingpit ah an thilruk mi pawl cu an sangka kiangah an va ret thluhsal.

Inn neitu Daw O in, “Zinglam ah ka tho ih sangka ka vun ong cu thil funmi ka hmu. Zo in an ra ret ti ka thei lo, innsung ah ka lutsal ih thil funmi cu ka ong, a sungah ka inn an bauh tum ih an thilruk mi pawl arak um thluh. Kan ngahsal ding ti ka zum lo, zingthlapit ah an ra ret a si ding” a ti. Ziangruangah an thilruk mi pawl an retsal ti cu theih a si lo.

Thudang: Hlanlai Hindu Biakinn Ta Milem An Ru, Mangsia An Man Ringring Ruangah Milem Cu An Va Retsal: India ram ah suamhmang pawlin hlanlai Hindu biakinn ta milem 16 an ru. Milem an ruk hnu ihsin mangsia an man ringring, ṭihnung um zetzet mang an man ruangah an itthat ngam lo.

Himi temple cu Lord Balaji temple a si, an pathian Vishnu piansalnak hmun le ram a si ih kum 300 ih upa temple a si. Tualsung mipi le palik pawlin rukru cu an hawl rero nan an hmu thei lo. May 16 zan ah an rukmi milem cu temple puithiam tei innhmai ah an rak ret ih ngaithiam dilnak cahnah an tan.

Cahnah sungah “Mangsia, mang ṭihnung um zetzet kan man ṭheu ruangah milem pawl kan ra retsal. In ngaithiam uh, kan itthat thei lo. Rawl khal kan ei thei lo ih thindaiten kan um thei lo ruangah nan rohlu pawl kan retsal” tin an ngan. Rukru pawl cu an kai ngah hrih lo.