Monu In Sumpai Tam Zet Cem In Mopuai A Tuah Nan Mopa A Feh Lo, A Hlo

Thailand, Prachinburi ah mopuai an tuah ih mopa a feh lo, a hlo lanta. Kum 40 mi Namthip in tlangval anei, Namthip cu factory ih hnaṭuan a si. May 1, 2022 ah a tlangval thawn neiaw dingin an tawlrel nan an neiaw ngah lo.

An neihawk ding ni lawngah a tlangval in arak bum ti a thei, a tlangval cu ralbawi vekin aum ih an ramhruaitu ih bodyguard vekin aum. A ṭongdan le aumdan ruangah Namthip in rinhlelnak zianghman a nei lo ih ralkap a si ngai le ngai lo khal a zingzoi lo.

Namthip in an sungkhat sumpai a cawi ih ฿300,000 cemliam in mopuai a tuah, cabuai 50 an ret ih mikhual pawl cu amahten arak hmuak. Mopa a thleng thei lo ruangah Royal Thai Army pawl an phone ih a tlangval ih thuhla le a hmin an sim thei, ralkap ṭuanvo neitu in ralkap hmin cazin pawl a zohdik hnuah cuvek mi an um lo a ti.

A tlangval ih hmin cu Suwannahong a tiaw ih hminlem si an zum. Namthip in, “Nikum December ihsin ka tlangval thawn kan kopaw zo, ralbawi vekin aum. A ṭongkam le aumdan ruangah rinhlelnak zianghman ka rak nei lo, kan inn khalah ara um ringring ih hnaṭuan in bawm ṭheu.

Mifel le miṭha zet a si. Kan kopawk sungah a innsang le a sungkhat pawl hi veikhat hman ka tong lo, ton ka tum ṭheu nan thuhla phunphun a tuah ih ka tong ngah lo. Bumawknak a si” a ti.

Namthip ih nulepa in moman ah ฿200,000 le sui an ngen, an neihawk ding zinglam ah phone thawn an biaw ih a tlangval in moman hi a tamtuk tin ṭongkam an el’aw, cumi hnu ihsin a pehtlaih thei nawn lo. Aumnak khal an thei nawn lo ih mopa tello in ruai an theh.

Be the first to comment

Leave a Reply

Your email address will not be published.


*