Monywa Ah Tlawng Sayama Gyi An Kap That

Monywa, Sithar khua ah tlawng Sayama Gyi Daw Soe Myat Min cu tlawnginn lam a feh laiah an kap that. Kum 44 mi Soe Myat Min cu secondary school tlawng ah Sayam Gyi ṭuanlai a si, June 5 zinglam ah tlawnginn a feh laiah lamzin ah an kap that.

Hmin tarlang remlo tualsung mi pakhat in, “Myothit vengsung lamzin ah an kap that. Non-CDM sayama a si, ralhrang in tlawng an on hnuah khuasung mipi pawl cu tlawngkai dingin a fial. A hlan ihsin tlawng saya/sayama pawl cu CDM tuah dingin ralrinnak an rak pe zo” a ti.

Ralhrang pawlin Sayama Gyi Daw Soe Myat Min kap thattu cu PDF pawl an si tin an thuthang sungah an tarlang. Media pawlin Monywa ramsung ih PDF ṭuanvo neitu pakhat an sut ih ‘Thilthleng a cipciar in a theihfiang hrih lo ruangah a sim thei hrih lo thu arak sim. Ralhrang pawlin June 2, 2022 ihsin rampum huap nauhak pawl tlawngkai dingin an phuang.

Thudang: Shakira Tei Nupa Cu Kum 11 Hnuah An Ṭhenaw
Leitlun ih hlasakthiam hminthang Shakira (kum 45) le a pasal bawlung sit thiam Gerard Piqué (kum 35) cu kum 11 sung an umtlang hnuah an ṭhenaw fel. An pahnih lungkimnak in, “Kan ṭhenaw tin kan nenhnget ruangah poi kan ti zet. Kan ruat thupi bik mi kan fale pawl ruangah kan thubuai hi in zahsak hram uh. In theithiamnak parah kan lungawi” tin an tarlang.

An ṭhenawknak thubuai hi an tarlang lo.Thuthang ṭhenkhat ahcun a pasal Gerard hi a uire, a bawlung sitpi pakhat ih nu thawn an ittlang tin an ngan. Shakira le a pasal Barcelona arsi Gerard Pique cu 2010 World Cup ihsin an hmeltheih aw. Cutawk ah Shakira in “Waka Waka” timi hla a sak, tu’ah fa pahnih an nei zo. Shakira tei nupa hi kutsihnak an nei hrih lo.

Media pawlin thu an sutnak ah a pasal in, “Kan boruak a ṭha ih neihawk sawmawk khal a ṭul hran lo. Tu’ih kan umdan hi a ṭha ka ti. Fa kum 9 mi le kum 7 mi kan nei zo, kan kopawknak cu a ṭha zet. Neihawk kherkher a ṭullo” a ti. Shakira hi a pasal aiin kum 10 in a upa sawn.

Media pawlin thu an sutnak ah a pasal in, “Espanyol team fehtlang ih bawlung sit cu nuam ka ti tuk. Leitlun ah tahthim ding aum lo, Real Madrid ih ka lek lai aiin nuam ka ti sawn. Espanyol team ih bawlung sit cu nupa-sinak hman aiin nuam ka ti sawn” arak ti zo. Shakira in a pasal cu an inn ihsin a dawisuak ih tu’ah a fale pahnih thawn an um. A pasal thawn an ṭhenawk fel zo ruangah Barcelona ram ah aum nawn lo ding, Barcelona ram ah sungkhat le rualpi a neih lo ruangah a fale pahnih hruai in an ram Colombia ah a tlung tum.

Be the first to comment

Leave a Reply

Your email address will not be published.


*