Motor Cansualnak Ih Thi Chinmi (3) Cu Thailand Ram Ah An Vuiliam

August 17, 2022 zinglam nazi 11:00 hrawngah Kawlram mi pawl to mi motor cu Thailand lamzin kap ah cansualnak an tong. Daan lo ih Thailand ramsung lut an si, motor sungah Kawlram mi 33 an to.

Kiangkap ih um pawlin, “Motor ihsin puak awn kan thei ih motor cu an control thei nawn lo ruangah lamzin kap ih um thingkung cu napin an pah. Motor cu a let siat thluh” an ti. Cansualnak tong Kawlram mi pawl cu Malaysia ram ah hnaṭuan dingih feh an si.

Motor mawngtu le mi ṭhenkhat cu an tlanhlo ih palik pawlin an hawl rero lai. An cansualnak hmun ah mi 3 an thi ih pakhat cu siizung an thleng hnuah a thi. Mithi pathum cu Chinmi an si. Mithi pawl cu Kalaymyo, Indaingkone veng sungih um Pa Hu Lian (kum 26). Pa Hu Lian in a nupi le a fanu kumkhat mi a thihsan.

Kalay peng Tanbu khua ih um pacang kum 30 mi Pa Za Nei Khup (Fa pahnih a nei) le Yangon ih um Ko Kyaw Lin Naing (kum 27) an si. Mithi pakhat cui Rakhine mi a si. Mithi ruak pawl cu Kawlram ih tlunpi a ngah lo ruangah Kawlram thawn a naihnak bik Mae Sot khua ih um Christian thlanmual ah an phum.

August 28, 2022 sun nazi 2:00 ah Mingalar Christian kawhhran ih tawlrelnak in Chinmi pathum ruak cu an vuiliam. Rakhine pa ih ruak cu Kawl biaknak sakhua daan vekin an urkang ding.

Be the first to comment

Leave a Reply

Your email address will not be published.


*