Mual In Liamsantu Salai Danny Thian Lian Ih Thuhla Tawi

FCC member Salai Danny Thian Lian Khup in mual in liamsan a si. Amah hi FCC ah rinsatzetmi Pathian ṭihzahtu mino ṭha, hruaitu a ṭuan laifang ah hibangtuk in in liamsan hi poi kan tituk ih kan riah a sia ngaingai.

A thuhla tawi: Hmin : Danny Thian Lian Khup, Suahni : 04 January 1989 (Kum 32), Thih Ni: 6 August 2021 ( Friday), Nu le pa : Pa Tial Thuan (Tleicia) & Nu Saw Cung, Khua : Phaitaya, Kalay, Umnak : Chowkit, Kuala Lumpur

FCC ah a pumpeknak Pathian hnaṭuan: Sunday School zirhtu, Calai Committee member, Praise and Worship hruaitu. Cun, kawhhran huapin siseh, Mino cangvaihnak le homecell cangvaihnak ziangkim ah thatho zetin ṭuan ringringtu khal a si.

FCC minister pawl le hruaitu ṭuanpi pawlin a dam lo thok ihsin thla kan cam sak ringringmi asinan dam lam pan nawn loin in liamsan hi poi kan ti ngaingai. 16 July 2021 ah Covid test awknak a nei ih positive a rak si. Cutin a umnak ah caan tawkfang a tuamhlawm aw.

Dam lam a pan thei ngaingai lo ruangah (Theihsual lo asile) 24 July 2021 ah Siizung a lut. Cun July thlacem lam tiang cu cakuat in mi a biak thei lai, “ka dam vivo thlang” tiah amah rori khalin a timi a si nan August thla thar hnu hicun amah biak theih a si nawn lo vivo ih cutin in liamsan a si.

A damlonak dang pakhat cu kaileng nat a nei ih a tuar har phah theu thu khal kawhhran thlacam khawm tikah thlacam a rak dil theu. Amah hi a hnaṭuannak hmun ah boss ih pekmi inn ah rualpi pawl thawn a um tlangmi a si.

Tanta mi zate hnenah Pathian in thlangam daihnak pe cio hram seh tiah thlaza kan cam sak. A ruak tuamhlawmnak lam cu neta kan thanawk leh ding a si. Mipi in ruakvui service hman theih a si lo ruangah ṭuanvo neitu lawngin SOPs thlun in caan an hmang ding a si.

Thuphuan 21:4 “An mitthli hmuahhmuah a hnul sak ding. Thih a um nawn lo ding, ninghang riahsiat, aihram tahnak le natnak a um nawn lo ding”. (FCC Falam Christian Community – Malaysia)

Be the first to comment

Leave a Reply

Your email address will not be published.


*