Muse Ah Hnaṭuan Dingin Ava Feh Ih Lamlak Ah A Hlo, Tulai China Ramri Hrawngah Hin Mihlo An Tam

Shan State, Manton khua ih um tlangval kum 18 mi Maing Aung Paing Phyo cu Muse ah hnaṭuan dingin a poksuak ih lamlak ah a hlo, a innsang pawlin an pehtlaih thei nawn lo. October 8, 2021 sun ah Manton ihsin amahten a poksuak ih Lashio ah zankhat a riak, a thaizing ah Muse lam feh tum a si nan cutawk ihsin a hlo. A phone khal an call thei nawn lo.

A pi in “Ka tupa kan pehtlaih theilonak cu zarhkhat hrawng a si zo, Muse ah hna ka ṭuan ding a tiih Manton ihsin a poksuak, Lashio ah zankhat a riak ih Muse lam a feh ding ni ihsin kan pehtlaih thei nawn lo. Muse a feh ding ni October 9 zinglam ahcun kan biaaw thei lai, simlam ihsin kan pehtlaih thei nawn lo” tin an thinhar thu a rel.

Maing Aung Paing Phyo cu Manton ihsin Lashio tlan bus cu amahten a to hnuah a hlo, nan rak hmu pang asilen 09-407 449 455 ah in rak pehtlaih hram uh a ti. Tulai China ramri Muse kiangkap hrawngah hin mihlo thuhla theih ding aum phahphah.

Thudang: Muse Ih Hnaṭuan Nunau Te A Hlo: Shan-China ramri ih hnaṭuan nunau kum 17 mi a hloh thu theih a si ih an hawl rero lai. Shan State, Namtu Township, NaPin khuami nunau kum 17 mi Ma Shwe Zar le a pasal Sai Tun Win cu September 18 sun ah Muse khawpi ah hnaṭuan dingin an feh. Muse an thlen hnuah hmun dangdang ih hnaṭuan dingin an ṭhenaw ih cutin a hlo lanta.

A hloh sun ah a pasal thawn an biaaw ih hnaṭuannak ihsin a tlung hrih lo thu a sim, cumi hnu ihsin a phone tlang thei nawn lo. An pu a phone ih an pu in hnaṭuannak ihsin a tlung zo arak ti cu thilumdan theithiam loin a pasal cu a mangbang tuk.

Sai Tun Win in “An hnaṭuannak hmun address khal ka thei hrih lo. Siangpahrang inn kiangah ti cu in sim ta, rualpi pawl thawn an si ruangah a cipciar cun ka rak sut lo” a ti. Ma Shwe Zar ih a hloh thuhla cu inn lam an theihter hrih lo, an pu le a rualpi pawl khal thilumdan an sut rero lai ih an relfiang thei hrih lo.

Sai Tun Win in a nupi a hloh thu cu palik le ralkap hnenah a report zo. “Nan rak hmu asilen 09-426-772-048 ah in sim thei hram uh” tin Sai Tun Win in a tarlang. Comment pawl zoh tikah China ramri Muse khuasung ah nunau hlo an tamtuk zo ruangah ralring a ṭul tuk an ti rero.

Be the first to comment

Leave a Reply

Your email address will not be published.


*