Muse Ah Ralhrang Kuthnuai Pawl An Sualaw Ciamco

Myanmar-China ramri ih um Muse khawpi ah ralhrang kuthnuai ih cangvai rerotu hriamkai pawl cu an sualaw ciamco. Muse ramsung ah himi pawlkom pahnih hi an rak kapaw ciamco zo ih mithi le hliamtuar khal an um, cumi thuhla cu ralbawi in va cinfel sak dingin ava feh ih an kuthnuai ih um hriamkai pawlkom in ralbawi cu an rak cohlang lo.

Tualsung mi pakhat in, “Tatzin ralbawi ara ih an rak cohlang lo, ṭongkam an el’aw ciamco. Kan duhduh kan kap ding, tatzin ralbawi ih zianghman rel ding anei lo an rak ti. Ralhrang pawlin an cawmmi hriamkai pawlkom hi an control thei nawn lo, an pehtlaih awknak khal a ṭha nawn lo” a ti.

December 29, 2021 zan ah hriamkai pawlkom pahnih cu an tongaw ih lamzin laifang ah an sualaw ciamco, an sualawknak ah hriamkai pakhat a thi ih pathum in hliamhma nazet an tuar.

Muse ramsung ih um ralhrang kuthnuai ih cangvaitu hriamkai pawlin an pule ralhrang pawl ih thu an lung nawn lo, ralhrang pawlin hriamkai pawl cu khausung ah uniform hruh in vaksuak lo ding, khuasung ah meithal keng lo ding tin thu an pe nan an thlun duh lo. An sualawk zan khalah uniform an hruh thluh tin kiangkap um pawlin an rel.

Tualsung mi in, “Ahlan hnakin hriamkai pawl hi an puarthau deuhdeuh, mipi hrangah cun thinphang ding aum ciamco lo. Ralhrang pawlin thu an nei nawn lo ti a theihtheih” a ti.

Be the first to comment

Leave a Reply

Your email address will not be published.


*