Muslim Raltlan Pawl Cu Christian Ah An Lut Ciamco

Harsatnak, buainak kan ton tinten kan zumnak a hngetkho vivo. Muslim raltlan pawl cu German ram an thleng hnuah Berlin khawpi ah Christian sakhua ah an herlut aw ciamco.

Trinity Church Pastor Gottfried Martens in “Kum 2 sungah member 600 kan pung man, mangbangza a si” tin Associated Press hnenah a sim. Raltlan pawl cu Iran and Afghan pawl an si, tunaite khalah Iran raltlan Mohammed Ali Zonoob tei innsungsang cu baptised an la.

Zonoobi le a nupi Afsaneh in “Tu’ahcun kan zalen zo, kan nauhak pawl ih hmailam caan khal a ṭha zo ih Germany ramah fimthiamnak an zir thei thlang ding” an ti.

Ṭhenkhat in “An zumnak ngaingai ruangih Christian lut an si lo ding, Germany ramsung ih an um duh ruangah Christian sakhua ah an lut men a si ding” an ti. Pastor Gottfried Martens in “Hitawk hmun ah mi tampi an ra lut zo, an raltlan sinak in beiseinak an nei ti ka thei ko.

Hitawk hmun ih ra tu zaten kan cohlang a si, Christian sakhua sinak ruangah an raltlan sinak cu cozah in a cohlang ding ti aum lo” a ti. Mi tampi cu piangthar ngaingai loin Christian ah an lut nan zumtu pawl thawn caan an hmang tam vivo ih an zumnak khal a hngetkho vivo. (#Christian Post)

Be the first to comment

Leave a Reply

Your email address will not be published.


*