Myanmar Goal Kiltu In “Leitlun Mipi Hmaiah Duhphorhnak Nan Tuah Thei, Nan Kutzung Pathum Tung Uh” A Ti

2022 World Cup lek thei dingih zuamawknak cu Japan ram ah an nei rero lai, Myanmar ramsung ih bawlung sit thiam an hriltling mi pawl khal Myanmar rampi aiawh in an lek tum ve. Japan ramah an um zo ih tui zanlam May 28 ah Japan ram thawn an lek ding.

Asinan, Myanmar team sungah buainak phunphun a thleng, team member 10 cu ralkap uknak kuthnuai ah kan lek thei lo tin CDM an tuah. Bawlung sit thiam 10 an lek tum lo ruangah Myanmar team cu seherh an um zet, an team captain Zaw Min Htun khal a tello ding.

Cun, an goal kil thiam hminthang Kyaw Zin Htet khal CDM ah a lut, a aiawh ah Ko Ko Naing in a kil ding. Kyaw Zin Htet in “Ka ṭongkam parah ka dinghnget ih ka lek lo ding, kan team member pawl kan lungrual lo a si bik.

“Nan lek laiah leitlun mipi hmaiah duhphorhnak tuah tum uh, nan kutzung pathum tungsuak uh. Myanmar mipi hrangah nan tuah thei umsun a si” tin a naule pawl hnenah thu a cah.

Asinan, an coach Germany Anthony Hay in “FIFA daan vekin zohman in duhphorhnak an tuah lo ding. Leknak ah ramkhel thuhla le sakhuanak kengtel kan siang lo. Ka um sungah zohman in anmai duhdan in an cangvai lo ding” a ti.

Myanmar rampi aiawh ih lektu lakah Chinmi 3 an tel, an hmin cu David Htan, Suan Lam Mang le Lal Din Mawia pawl an si.

Be the first to comment

Leave a Reply

Your email address will not be published.


*