Myanmar Idol Zuamtu In A Zuk A Tar Ruangah A Rualpi In “Ziangah Hivek Zuk Na Tar? Ziangtin Hla Na Sak Thei Nawn Ding?” Tin A Sut Ih A Letnak

Mai Mai Seng cu Myanmar Idol Season 2 zuamawknak ah a tel ih Top 10 tiang arak thleng ban. Cumi hnuah awnmawi khawvel ah a lut ih hmun dangdang ah mipi awi dingin khual a tlawng vivo. Ralkap in thuneihnak an lak hnu ihsin lamzawhnak ah a tel ṭheu ih ralkap cozah cu a phunphun in a dodal.

Cutin, ramri ah a tlan ih PDF ah a lut, August 1 sun ah PDF kor hruh in a zuk a tarlang ih “San thuanthu hlun ah kan kirsal nawn lo ding, ralkap sal kan silonak dingah a cemnet tiang kan do vivo ding” tin a tarlang.

A rualpi pakhat in “Ziangah hivek zuk na tar? Ziangtin na hmailam caan na hmang tum? Ziangtin hla na sak thei nawn ding?” tin a sut.

Mai Mai Seng in “Kei cu PDF ralkap ka si zo, keimah vekin ziangkim fehsan in PDF luttu ka ulenau tampi an um. Kei aiin buainak tong an tam zet, ka unau lakah Covid-19 ih thi nulepa an tam zet zo. Ka tuarpi zet, milar le hminthang tuk ka si lo nan ka rualpi pawl thazang peknak ah ka zuk hi ka tar.

Nangmah lawng na silo kei khal nan hnenah ka um ringring timi ka langter duh ruangah a si. PDF ka ulenau pawl nan beidong hlah uh. Himi zuk ka tar ruangah ka tong ding mi pawl ka theicia ko. Inn tlung a ngah nawn lo ding, a hlan vekin zalen zetin caan ka hmang thei nawn lo ding ti cu pathian lawngin a thei.

Asinan, ziangkim ka ruatfel zo ih thuthluknak khal ka tuah zo, milar hminthang zet ka si lo nan Myanmar ramsung hmun dangdang ah hlasak dingin ka rak feh rero zo. Tipikap khal ka thlenlonak hmun aum nawn lo, ramdang khalah hlasak dingin ka rak feh ṭheu.

Ei le in thaw an timi pawl khal ka ei thluh zo, ka rak tuah thluh zo ruangah ka hrangah a tawk zo. Ka duhtawk in ka hnangam zo.

Ka ra tlung thei nawn lo asilen tlangram ah inn te sakin leilet tuah phahin hnangamten ka khuasa mai ding. Hlanral ihsin hla ka run sak dingih Youtube le page ah ka run tar ṭheu ding. Ka tumtahmi hlawhtling loin ka rak thi asikhallen ka tuah ding mi pawl ka tuah thluh zo ih hnangamten ka thi ko ding” tin a let.

Be the first to comment

Leave a Reply

Your email address will not be published.


*