Myanmar Ralkap Pawl Hotu Ih Nupi A Thlatem, Ralkap Nupi Pawl Hnenah Ralrinnak Thu A Sim

Tulai Myanmar ralkap innsang ah thihhlohnak a thleng rero thlang ruangah ralkap innsang pawl cu an thinphang tuk. Home Affairs Minister Lieutenant General Soe Htut ih nupi Daw Nilar Sein in ralkap nupi pawl hnenah ralrinnak thu a sim cu online parah a putsuak.

General Soe Htut cu Myanmar ralkap pawl ih an hotu pakhat a si ih kan dungnaite ah a fapa rawleinak restaurant ah buainak a thleng zo ih hotel neitu le hnaṭuantu pawl cu an kai thluh.

Daw Nilar Sein in “Security ṭhaten nei ringring uh, Naypyitaw ih ralkap officials inn, Ministry of Home Affairs inn le ralkap pawl inn bomb puah dingin Pyinmana ihsin minung 30 an ra poksuak ti thuthang kan thei ruangah ralrinten um ringring uh. Nan inn ah thil pakhat khat ara thleng asilen zohdik ta uh, zan ih nan itthat caan khalah ralring uh.

Ralkap/palik uniform hruh in vaksuak hlah uh, nan motor sungah uniform hruh an hmuh asilen nan motor bomb puah an tum ding. Senior officials ih fale pawl cu zan ah rawlei dingin vaksuak hlah hai seh, restaurants sung khalah misual pawl thuthang petu an rak um thluh.

An ṭihnung tuk nan ṭihnung um vekin an lang lo ding, Buddhist cathianghlim in kilhim aw uh. National Unity Government (NUG) facebook khal report tuah uh, an hotu Dr. Zaw Wai Soe le Pencilo timi facebook 2 hi a siat hlanlo nitinten report tuah ringring uh.

Report dan nan thiam lo asilen nan fale pawl sut uh. Himi facebook 2 in mipi pawl an cokphur, Dr. Zaw Wai Soe ih relmi ipiang mipi in an tuah hngal. Curuangah tuizan ihsin report tuah thok uh…” tin Viber Group fehtlang ihsin a sim. Tutiangah Dr. Zaw Wai Soe le Pencilo facebook cu a siat hrih lo, followers 400,000 le 2.8 million nei in an active ringring lai.

Be the first to comment

Leave a Reply

Your email address will not be published.


*