Myanmar Ramsung Buainak Ah Sagaing In Zalennak An Ngah Zik Te Bik

Tulai Myanmar ramsung buainak, ralhrang pawl donak ah Sagaing ram in zalennak an ngah zikte bik, a naibik tin Beauty for Chin State ah an tarlang. Sagaing ramsung ah peng 47 an um ih himi peng zaten in PDF an nei thluh, Sagaing ramsung ah PDF pawlkom 50 zikte an um ih an tangtlang thluh.

Khua dangdang ih um PDF pawl cu an thazang a cak zet ih an pehtlaihaw thluh, Sagaing ramsung ah ralhrang kuthnuai ih khaw lal ṭuan an um nawn lo. Hlanlai Myanmar rampi a veithumnak rak tungdintu Alaung Min Thar an timi Aung Zeya ih suahsemnak Shwebo khua khal Sagaing ramsung ih um a si.

Miralṭha semsuahnak tin an mino thangthar pawl ih thisen sung khalah ralṭhanak in a fangkual thluh, tuiṭum khalah ralṭha zetin ralhrang pawl an do rero lai. Sagaing ram saklam ah Kachin ralkap KIA pawl an um, thlanglam kiangkap ah Chin ralkap CNA, CDF pawl an um ih Magway ramsung ah PDF pawl an um.

Ralhrang pawl an do tikah an zaten an tangtlang ṭheu, ralhrang pawlin leihnuai ihsin an do ngam nawn lo ruangah doawknak helicopter 6 in an kap rero nan an neh thei cuang lo. Leihnuai lam ihsin cun ralhrang pawlin an do neh thei nawn lo, Sagaing ramsung lutnak hmunkip ah bomb an kam thluh ih ralhrang pawl cu uniform hruh ngam loin khuasung motor hmangin Sagaing ramsung ah an lut ṭheu.

BBC in ralhrang pawl aiawh ih thuphuangtu Zaw Min Tun thu an sutnak khalah Sagaing ram an do neh thei lo thu a sim thei. Mipi kilhimtu pawlin Sagaing ramsung an uk thluh thei asilen tuiṭum dothlennak ah thlengawknak nasa zet aum ding ti zum a si. Tualsung mipi kilhimtu pawlin ralthuam ṭha, meithal ṭha nei sehla cun Sagaing ramsung zaten kan la thei zo ding, Lai meithal lawng hman in hi tiang kan do neh zo” an ti.

Be the first to comment

Leave a Reply

Your email address will not be published.


*