Myanmar Ramsung Ih Thilthleng Riahsiat Umza

Covid-19 thlisia a veithumnak cu Myanmar ramsung hmuntinkim ah a hrang rero lai. Tuamhlawmtu sibawi an daihaw lo ih hleiah oxygen khal an daihawk lo ruangah mithi an tam zet, Yangon ih mithi ruak urkangnak hmun khalah mithi pawl urkang dingin an tlar aw.

Myanmar mipi pawlin harsatnak phunkim an tuar ih an riahsiatnak auaw cu “Myanmar ramsung ih ka rak piang cu ka vanduai tuk aw. San dangah, minung ih ka piangsal ding asilen Myanmar ramsung ih piang nawn lo dingin thlaza ka cam” an ti.

Covid-19 thlisia hrang lai ih riahsiat umza mallai kan run tarlang ding. Lambest Aye Zar in zanlai ah hitin ca a tar, “Khua aw, vang zang aw. Ka nu damlo hi ka zoh thei nawn lo. Sibawi pakhat khat kan inn ah ra in sii ra dawt uhla ka va duh so, sii nan dawt lo asikhallen siivai lei theinak ca tal in ngansak uhla.

Siibawi ca tello in siivai lei len an siang fawn lo, ka nu in oxygen a ṭul tuk, zingpit khuavnag veten oxygen ka hawl hngal ding. Tu’ahcun zan nazi 10:00 a luan fang si, in bawm theitu nan um lo maw si…” tin a tarlang.

Cumi hnu zinglam ah “Ka nu, oxygen ka hawl lai si. Reilote sung in rak hngak aw ka lo ti si, in hgak thei nawn lo maw…” tin a tarlang. T Mono timi tlangval pakhat khal Covid-19 in a damlo ih a room sungah a khum aw, tuamhlawmtu zohman a nei lo ih amahten a talbuai.

A facebook cahmai ah oxygen a ṭul tuk thu vei 11 rori a tarlang nan a hlawhsam, oxygen level 55 a thleng tikah a facebook cahmai ah bawm dilnak ca a thlah lai nan bawmtu an um lo ruangah a zan ah a thi cih.

Hsu Lay timi khalin “Ka thin na tuk, oxygen hawl in ka vaksuak rero ih ka hmu lo, inn ka va thleng veten ka nu cu beiseinak tumpi nei’n in rak zoh ringring. A damlo bese tuk ruangah a ṭong thei fawn lo, a mithmai ah beiseinak anei ti ka thei nan oxgyen len ka hawl hmu lo. Ka ṭahsuak tuk nan ka nui hmaiah cun ka ṭap ngam si lo, tuizan teh ziangtin kan um ding..” tin a tarlang.

Ko Mor Nwe in “Mizan ah ka nau ih nupi cu Covid-19 in a thi, asinan tuisun tiang a ruak cu zohman in an ra la hrih lo. Zankhat ah kan vengsung ah mithi 3 rori an um ti ka thei. Innkhan te sungah mithi ruak thawn, nauhak pawl thawn, midang khal kan nuamsam lo thluh ruangah ziang rel ding khal ka thei nawn lo” a ti.

Be the first to comment

Leave a Reply

Your email address will not be published.


*