Nau Nei Zikte Naupai Lai Ih Pum Ah Nam In An Dawt, Innsang Member 5 An That

Myanmar ramsung a buai rero laiah rukru, suamhmang le damiah an tam zet. Sagaing, Depayin Township, Thayar Aye khua ih um innsang member 5 cu zo ti theih lo suamhmang pawlin November 23, 2021 zinglam nazi 3:00 hrawngah an va sim ih an that thluh.

Depayin-PDF hotu in, “Rapthlak zetih an thatmi innsang cu milian zet an si. Kan zumdan cun huatawknak ruangih that an si ding, cuti asilolen an neihmi sumpai le ro thilri pawl laksak duh ruangah damiah an ṭaih a si ding. Depayin-PDF in hivek ih cangvaitu pawl cu kan zoh men zik lo” a ti.

An thatmi innsang cu kum 55 mi U Myint Win tei innsang a si, ramkhelhnak thuhla khalah an tello ih daiten aummi innsang nuam zet an si. Tualsung ih milian innsang an si ih innsang member 6 an um. Himi thil a thleng zan ah nunau pakhat cu sungkhat inn ah arak riak ih a him, mipa pakhat le nunau 4 cu suamhmang pawlin an that ih an sumpai le an sui le ngun khal an laksak.

Suamhmang pawlin tuahcop meithal le namtong in an sat that ciamco, nunau ṭhenkhat cu an hngawng ah an at. U Myint Win cu meithal in an kap that, naupai lai cu a pum ah nam in an dawt ih a pum sungih um naute thawn an thi.

Suamhmang pawl cu zo an si ti an thei hrih lo ih tualsung mipi kilhimtu pawlin phuba la dingin an zingzoi rero lai. Mithi ruak 5 cu November 23, 2021 ah an vuiliam. Depayin ramsung ah suamhmang le damiah an tam zet. October 26 khalah Aung Naing Soe tei fapa thum cu hriamkai mibur khat in an rak that zo.

Be the first to comment

Leave a Reply

Your email address will not be published.


*