Nauhak 19 Le Zirhtu 2 Thattu In Mi A That Hlante Ah Tleirawl Kum 15 Mi Hnenah A Duh Thu A Sim Thei

May 24, 2022 zinglam nazi 11:32AM ah mino kum 18 mi Salvador in tlawngta nauhak pawl a kap ciamco ih nauhak 19 le zirhtu 2 an thi. Salvador khal palik pawlin an kap that ve. German, Frankfurt khawpi ih um tleirawl kum 15 mi Cece thawn online fehtlang in an bia’aw ṭheu.

Online sungih hmeltheih lo pawl thawn video call ih biakawknak Yubo ihsin an theiaw ih Instagram le FaceTime in an bia’aw ṭheu. An biakawknak hi zarhhnih hrawng a si zo. Cece in, “Amahten aum ringring. Rualpi pawl thawn thiltuah tlangkhawm khal anei dah lo. Kan biakawk ahcun a aipuang in a hlim thei tuk” a ti.

Salvador in Cece hnenah ‘nan khua ah ka ra tlawng cing ding’ a ti. Kum 18 a kim ih a suahcam ah meithal a lei, meithal dawr ih aum lai khalah Cece cu video call in a bia ih Cece in, ‘Ziang hrangah meithel le cerek cu na lei?” tin a sut. Salvador in, “surprise thil a si, rak hngak awla na thei leh ding” a ti.

May 24 zing nazi 11:00 ah Cece cu a phone ih a duhdawt thu a sim thei. Minute 20 hnuah, “Ka pi hmaiah ka kap. Elementary school ah tlawngta nauhak pawl ka va kap ding” tin ca a kuat. Cece in a cakuat cu a siar nan thungai ah a ruat lo.

Cece in, “Thuthang ka thei cu ka lau tuk. Palik hnenah ka rak sim thei lo cu ka siraw tuk, a tuah ngaingai ding ti theicia sehla cun boruak hi ka thleng danglam thei ding nan” a ti. Cece hnenih a simmi thil pakhat cu, “Mi inn ah zawhte thi ka deng” a ti.

Salvador cu a pi ih motor a mawng ih tlawnginn ah ava feh, a hmuhhmuh tlawngta nauhak pawl cu a kap ciamco. Nauhak 19 le zihtu 2 a kap that, mi tampi in hlaimhma an tuar ih siizung ah an tuamhlawm rero lai.

A rualpa in, “Kan tlawngkai laiah kan komaw ṭheu, game kan lek tlang ṭheu. Salvador hi an farah tuk ruangah kan tlawngkaipi pawlin an hmuhsuam tuk. A hnipuan hruhmi cu capohnak ah an hmang ṭheu, an hmuhsuam tuk ruangah tlawng khal a kai ṭha lo” a ti.

Wendy ah hna a ṭuan, a hnaṭuanpi pawlin a ṭong mal tuk. Midang khal a kom dah lo an ti. Tlawng a ṭheh lo, buaih a ngah lo ruangah a thinheng ih a pi thawn an kawkaw. A tlawngkaipi pawl buaih an ngah hnu a thaizing May 24 ah nauhak tlawnginn sungah ava lut ih tlawngta nauhak pawl cu a kap.

Be the first to comment

Leave a Reply

Your email address will not be published.


*